Саха сирэ уонна РФ Тутуу министиэристибэтэ өрөспүүбүлүкэ столицатын, Дьокуускай куорат хаһаайыстыбатын цифровизациялааһыҥҥа пилотнай бырайыагы олоххо киллэрэргэ сөбүлэһиигэ илии баттаатылар. Бырайыак «Өйдөөх куорат» бырагыраама чэрчитинэн киллэриллиэхтээх. Сөбүлэһиигэ илии баттааһыннара Санкт-Петербурга Арктика форумугар буолла диэн СИА суруллар.
Докумуоҥҥа СӨ Ил Дархана Айсен Николаев, РФ тутууга миниистирэ Владимир Якушев уонна Дьокуускай куорат мэрэ Сардана Авксентьева илии баттаатылар.
Айсен Николаев Владимира Якушевка ирбэт тоҥҥо турар Дьокуускайга куорат хаһаайыстыбатын салайыыны оптимизациялааһыҥҥа олус наадалаах бырайыагы өйөөбүтүгэр махтанна.
«Уруккуттан баҕарбыт ыра санаабыт туолбутугар үөрдүм. Дьокуускай «Өйдөөх куорат» бырайыакка киирдэ. Хоту сир дьонугар, Дьокуускай олохтоохторугар, цифровизация көмөтүнэн куорат хаһаайыстыбатын салалтатыгар, оптимизациялааһыҥҥа хамсааһыннар бараллара олус наадалаах. Арассыыйа Тутууга министиэристибэтэ салайар «Өйдөөх куорат» бырайыага ону олоххо киллэрэрбитигэр тирэх буолар. Саха сирин уонна мин тус бэйэм өттүбүттэн бары өйөбүл оҥоһуллуо. Сыалы-соругу куораппыт салалтата кыайа-хото тутуо диэн эрэнэбин, — диэтэ кини.
Ил Дархан өрөспүүбүлүкэҕэ тэриллибит бырайыактыыр офис үлэтэ саҕаламмытын, сотору бырайыагы олоххо киллэриигэ ылсыаҕын эттэ.
Санатан эттэххэ, Дьокуускай быйыл кулун тутарга «Өйдөөх куорат» бырайыагы олоххо киллэрэргэ пилотнай муниципалитеттар ахсааннарыгар киирбитэ. «Өйдөөх куорат» систиэмэтэ куорат былааһа уопсастыбаны уонна инфраструктураны кытары быһаччы уонна хардарыта сибээстээх үлэлииригэр, түргэн интэриниэт, автоматика уонна сенсор көмөтүнэн ханна туох кыһалҕата үөскээбитин, куоракка туох буола турарын барытын тута көрө-билэ олороругар көмөлөөх буолуоҕа. Маннык ньыманан түргэнник тиэрдиллибит иһитиннэрии дьаһалта үлэтин түргэтэтэрэ, көмөлөөх буолара саарбахтаммат.
Арктика V форума Санкт-Петербурга муус устар 9-10 күннэригэр буола турар. Саха сирин дэлэгээссийэтин Ил Дархан Айсен Николаев салайар. Кини форумҥа көхтөөх кыттыыны ыларын сэргэ, сөбүлэһиилэргэ илии баттыаҕа. Саха сирэ бэйэтин павильонугар арктическай зонаҕа сүрүн инвестбырайыактар тустарынан мультимедийнэй картаны, Жатайдааҕы судоверфь макетын, сэлии муоһун бриллианы кытары дьүөрэлээн оҥоһуллубут «Арктический триумф Якутии» диэн композицияны, о.д.а. туруорда.