Муус устар 12 күнүгэр Космонавтика күнэ бэлиэтэнэр.
Саха сирэ уонна космонавтика быстыспат ситимнээхтэрин туоһутунан, лүөччүк-космонавтар хаста даҕаны Саха сиригэр кэлэ сылдьыылара буолар.
Олег Кононенко Саха сиригэр 2016 с. саха норуотун биир улахан суолталаах бырааһынньыгар — ыһыахха сылдьыбыта. Бэлиэтээн эттэххэ, Олег Кононенко космическай ыстаансыйаҕа хомуска оонньообут соҕотох лүөччүк-космонавт буолар. Кини үһүс космическай экспедициятыгар бэйэтин кытта саха норуотун айар тылын аҕатын Алексей Елисеевич Кулаковскай кинигэтин илдьэ барбыта. Бу кинигэ халлаан куйаарыгар кинини кытта 142 хонук устата сылдьыбыта. Бу кинигэни кини Ярославскай аатынан хотугу норуоттар устуоруйаларын уонна култуураларын мусуойугар бэлэхтээбитэ.
Биһиги Сахабыт сиригэр маны сэргэ хаста даҕаны Арассыыйа дьоруойа, лүөччүк-космонавт Федор Юрчихин эмиэ ыалдьыттаабыта. Кини Саха сирин туһунан олус иһирэхтик маннык ахтара:
«Мин Саха сиригэр дьыл бары кэмин көрбүтүм. Чысхааннаах кыһын оройугар да буолбатар, кыһыҥҥы кэмҥэ сылдьыбытым уонна бу дойдуга олорор дьону-сэргэни улаханнык ытыктыыбын».
Онон Саха сирэ уонна киэҥ халлаан куйаарын лүөччүк-космонавтара быстыспат ситимнээхтэр.
Ульяна ЗАХАРОВА.