Саха сирин Ил Дархана Айсен Николаев Петербурдааҕы экэнэмиичэскэй форумҥа Арассыыйа Федерациятыгар Корея Норуодунай-демократическай өрөспүүбүлүкэтин Суһал ыҥырыылаах уонна Боломуочуйалаах посола Син Хон Чхолу кытары көрүстэ.
edersaas.ru
Өрүттэр кэпсэтии кэмигэр КНДР уонна Саха Өрөспүүбүлүкэтин икки ардыларыгар бииргэ үлэлээһин кэскилин дьүүллэстилэр.
Син Хон Чхоль бэлиэтээбитинэн, Саха сирин Ил Дархана Айсен Николаевы кытары көрсүһүүгэ КНДР уонна Саха сирин икки ардыгар экэниэмикэҕэ, ол иһигэр чоҕу хостуур бырамыысыланнаска, бииргэ үлэлээһини сөргүтүү боппуруостара дьүүллэһилиннилэр.
«Биһиги бу бырайыактары олоххо киллэрэргэ үлэни салҕыахпыт. Саха Өрөспүүбүлүкэтин кытары бииргэ үлэлэһии салҕыы сайдыаҕар эрэнэбин», -– диэтэ Син Хон Чхоль.
Кэпсэтии кэмигэр Айсен Николаев КНДР спортсменнарын 2024 сылга Дьокуускайга ыытыллыахтаах успуорт норуоттар икки ардыларынааҕы VIII оонньууларыгар ыҥырда.
Көрсүһүүгэ ону сэргэ СӨ бырабыыталыстыбатын бэрэссэдээтэлин бастакы солбуйааччы Кирилл Бычков, СӨ тас сибээскэ уонна норуоттар дьыалаларыгар миниистирэ Гаврил Кириллин, СӨ бырамыысыланнаска уонна геологияҕа миниистирэ Максим Терещенко кытыннылар.
Надежда ЕГОРОВА, «Саха сирэ», edersaas.ru