Владивостокка СӨ бырабыыталыстыбатын бэрэссэдээтэлэ Владимир Солодов салалталаах өрөспүүбүлүкэ дэлэгээссийэтэ Индия өрөспүүбүлүкэтин кытары бизнес-миссияҕа көрүстэ. Бу туһунан биһиэхэ СӨ Тас сибээскэ уонна норуоттар дьыалаларыгар министиэристибэтин пресс-сулууспата иһитиннэрдэ.
Индия биэс штатын миниистирдэрин уонна улахан бизнестэн дэлэгээссийэни өрөспүүбүлүкэлэрин атыыга-эргиэҥҥэ уонна бырамыысыланнаска миниистирэ Пиюш Гоял салайан кэллэ. Арассыыйа өртүттэн Уһук Илин эрэгийиэннэр салалталара уонна РФ бырабыыталыстыбатын бэрэссэдээтэлин солбуйааччы, Уһук Илин уокурукка РФ бэрэсидьиэнин боломуочуйалаах бэрэстэбиитэлэ Юрий Трутнев билиһиннэрдэ.
Пленарнай мунньахха Арассыыйа уонна Индия бииргэ үлэлээһиннэрин кэскиллээх хайысхаларын туһунан сырдаттылар. Манна СӨ Бырабыыталыстыба бэрэссэдээтэлэ Владимир Солодов кытынна, маны сэргэ, кини 8 салаанан ыытыллыбыт сиэссийэттэн биирдэстэрин салайда.
Алмааһы кырыылааһын туһунан кэпсэтии сиэссийэтигэр алмааһы кырыылыыр, ювелирнай оҥоһуктарынан дьарыгырар 13 хампаанньа кытынна. 2018 сыллаахха Арассыыйаттан кырыыламматах, оҥоһуллубатах алмаас 44,7 мөлүйүөн карат 3,65 миллиард долларга (237 миллиард солкуобай) экспорка таһаарыллыбыт. Мантан Уһук Илин 35,2 мөлүйүөн караты 2,88 миллиард долларга (187 млрд солк.) экспорка таһаарбыт. Уһук Илиҥҥэ Владивостокка уонна Саха сиригэр икки ювелирнай-кырыылыыр кластер үлэлиир. Бэлиэтээн эттэххэ, Саха Өрөспүүбүлүкэтин экспорка тутулугар Индия иккис миэстэни ылар.
Бу сиэссийэ түмүгүнэн, Индия өртүттэн алмааһы кырыылааһыҥҥа исписэлиистэри кинилэргэ үөрэттэрэргэ, оттон кылааккайдааһыҥҥа Саха сиригэр индиялар куурустарын ыытарга эттилэр.
Саха Өрөспүүбүлүкэтэ уонна Индия Өрөспүүбүлүкэтин Гуджарат штата дьыалабыай бииргэ үлэлээһиҥҥэ сөбүлэҥ түһэристилэр. Меморандумҥа атыы-эргиэн -экэнэмиичэскэй, научнай-техническэй, иһитиннэрэр-биллэрэр эйгэлэргэ бииргэ үлэлээһин киирэр. Докумуоҥҥа СӨ бырабыыталыстыбатын бэрэссэдээтэлэ Владимир Солодов уонна Гуджарат штатын сүрүн миниистирэ Виджай Рупани илии баттаатылар.
Гуджарат штата Индияҕа экэнэмиичэскэй уонна атыы-эргиэн бырамыысыланнай эйгэлэргэ сайдыылаахтарынан биллэр. Экэниэмикэтин сүрүн тутулунан ювелирнай оҥоһуктары оҥоруу буолар. Маны сэргэ, нефтехимическэй, химическэй уонна фармацевтическэй салаалар, тыа хаһаайыстыбата, цемент оҥоруута инники күөҥҥэ сылдьаллар.