Ил Дархан Айсен Николаев VII Илиҥҥи экэнэмиичэскэй пуорум үлэтин иитинэн, Амурскай уобалас губернатора Василий Орловтыын Дьалында (Джалинда, Амурскай уобалас) – Мохэ (КНР) хайысхатынан тимир суол муостатын тутуу туһунан кэпсэттилэр.
Тутуу бырайыагын быһыытынан, Амур өрүһү туорааһыҥҥа Дьалында — Мохэ (Кытай Хэйлунцзян провинцията) хайысхатынан саҥа пууну тутуу буолар.
«Биһигини тимир суолун, тыа хаһаайыстыбатын кытары сибээстээх боппуруостар интэриэһиргэтэллэр. Дьалында — Мохэ тимир суол муостата Арассыыйа АТР дойдуларын кытары сибээстэһиитигэр эмиэ оруоллаах. Бу суолунан Саха сирин бырамыысыланнаһын бородууксуйата экспорка таһаарыллыаҕа», — диэн көрсүһүү кэмигэр Айсен Николаев бэлиэтээн эттэ. Саҥа тимир суол Кытай Норуодунай Өрөспүүбүлүкэтигэр бырамыысыланнай табаар экспорка тахсыытын кээмэйин улаатарыгар төһүү күүһүнэн буолуохтаах.
Амурскай уобалас губернатора Василий Орлов Саха сирэ уонна Амурскай уобалас килиимэттэрэ майгыннаһарын таһынан, эрэгийиэннэр доҕордуу сыһыаннаахтар диэн эттэ.
КНР таас чоххо наадыйыыта сылтан сыл улаатан иһэрин учуоттаатахха, саҥа тимир суол муостатынан оттугу таһаарыы 20-30 мөл. туоннаҕа диэри улаатыан сөп.
Санатан эттэххэ, Дьалында — Мохэ пограничнай туорааһын 1993 сыллаахха аһыллыбыта. 2000 сыллар саҥаларыгар таһаҕаһы тиэйии уонна пассажир сылдьыыта аҕыйаан, үлэтэ тохтотуллубута.
edersaas.ru