ВЭФ-кэ Саха сирэ Уһук Илиҥҥэ үлэҕэ ыҥырар мобильнай сыһыарыытын сэргээтилэр. Ол туһунан манна ааҕыҥ:
Уһук Илиҥҥи экэнэмиичэскэй пуорумҥа Саха сирэ Уһук Илиҥҥэ бырамыысыланнас предприятиеларыгар уонна тэрилтэлэригэр үлэҕэ ыҥырар мобильнай сыһыарыыны сүрэхтээтэ. “Навахту.рф” сыһыарыы 2020 с. Саха сирин баһылыга Айсен Николаев сорудаҕынан тэриллибит итинник ааттаах бырайыагы салҕааччынан буолар.
“Кэнники сылларга тэтимнээхтик сайдар Саха сиригэр олохтоох каадырдары бырамыысыланнаска кытыннарыы, үлэлээх буолуу социальнай уонна экэниэмикэ туруктаах буолууларын дьоһун боппуруоһунан буолар. Бу бырайыак хайыы-үйэ бүттүүн Арассыыйатааҕы буолан эрэрэ үөрдэр. Онон бүгүн эдэр ыччат дойдубут атын эрэгийиэннэриттэн Саха сиригэр эрэ буолбакка, Уһук Илин атын эрэгийиэннэригэр үлэлии кэлэр кыахтаахтар. Биһиги маннык бырайыактары салгыы сайыннарыахпыт”, — диэн өрөспүүбүлүкэ баһылыга бэлиэтээтэ.
“Навахту.рф” сыһыарыы хампаанньалар наадыйыыларын уонна Арассыыйа үрдүнэн хандьыдааттар резюмеларын тэҥинэн киллэриэҕэ.
Киин эрэгийиэннэртэн ыччаты үлэҕэ ыҥыраары, Арктикаҕа уонна Уһук Илиҥҥэ көһөн кэлэн, дойду Бэрэсидьиэнэ туруорбут соруктарын толорууга анаан бырайыагы сайыннараллар.
Арктикаҕа уонна Уһук Илиҥҥэ үлэлиэн баҕалаах каадырдар тустарынан чахчылары түмээри, Арассыыйа 19 эрэгийиэнигэр сыыппара филиаллара тэрилиннилэр. Бырайыагы РФ Судаарыстыбаннай Дуумата, Илини сайыннарыы министиэристибэтэ, КРДВ уонна ПОРА (Арктика сайдыытын бырайыактыыр офиһа) өйүүллэр.
“Саха сирэ биһиэхэ Навахту.рф. бырайыагы үлэлэтэргэ этии киллэрдэ. Ону өйөөн, тута ылыстыбыт. Бу дьыл ыам ыйыгар Уһук Хоту дойду сайдыытыгар көмөлөһөр пуонданы кытта сөбүлэһии түһэрсибиппит уонна тэрилтэлэрбитигэр үлэлииргэ ыҥыран, улуустарга тиийбиппит. Бу хас да ый устата тыа сириттэн 350 киһи үлэлээн эрэр. Бу хайа оробуочайдара, суоппардар, атын хайысхалаах үлэһиттэр, манна дьон үрдүк хамнаһы аахсаллар, салгыы сайдаллар, карьераларын оҥостоллор, үрдүк технологиялаах тэриллэргэ үлэлиир үөрүйэхтэнэллэр”, — диэн “Колмар Групп” АУо дириэктэрдэрин сэбиэтин бэрэссэдээтэлэ Анна Цивилева бэлиэтээтэ.
Саха сиригэр ситиһиилээхтик олоххо киирэр “Олохтоох каадырдары – бырамыысыланнаска” бырайыак бырабыыталыстыба уонна Саха сирин баһылыга Айсен Николаев өйөбүллэринэн хампаанньаҕа 1600 киһини үлэҕэ киллэрдэ. Бу сыыппара улаатар. Онон олус дьоһун суолталаах бырайыак дьон эрэгийиэннэргэ хаалан үлэлииригэр уонна РФ атын субъектарыттан дьону ыҥырыыга көмөлөөх.
Балтараа сыл устата хамаанда 13 тыһ. тахса киһини баазаҕа киллэрдэ уонна Саха сирин араас оройуоннарыттан 1217 киһини үлэҕэ ылыыны ситистэ.
“Бырайыак олоххо-дьаһахха уонна экэниэмикэҕэ улахан көдьүүстээҕин көрдөрдө. Хас биирдии угуллубут 1 солк. сыл устата эрэгийиэҥҥэ 192 солк. төнүннэрэр. Ый аайы 100 мөл. солкуобайтан тахса үп Саха сирин бары оройуоннарыгар хамнас быһыытынан дьиэ кэргэн дохуотугар киирэр. Арассыыйаҕа маныаха майгынныыр бырайыак ханна да суох”, — диэн Навахту.рф бырайыак ааптара Петр Чехордун бэлиэтээтэ.
“Навахту14.рф” бырайыагы 2020 сыл сэтинньи ыйга үлэҕэ киллэрбиттэрэ. Бу бырайыак үлэтэ суохтары эрэ буолбакка, үлэлээх эрээри, үрдүк хамнаска көһүөн баҕалаахтарга көмөлөһөр аналлаах. Үлэни көрдөөһүн, докумуоннары бэлэмнээһин, үөрэтии босхо уонна бырайыак цифровой платформатынан дьиэттэн олорон ыытыллар.
Петр Чехордун: “Бырамыысыланнаска кимэн киирэн иһиэхпитин наада”
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Хаартыска: Андрей Сорокин, СИА
Бэлэмнээтэ Женни Стрюкова