Бэҕэһээ, олунньу 14 күнүгэр, Саха Өрөспүүбүлүкэтин аатыттан Бүтүн Арассыыйатааҕы театральнай марафон кыттыылааҕар —А.С.Пушкин аатынан Нуучча академическай тыйаатырын кэлэктиибигэр Тыйаатыр сылын бэлиэтин—символын туттарыы буолла.
—Бу кубогы биһиэхэ аҕалбыт биир идэлээхтэрбит, Уһук Илиҥҥи федеральнай уокурук олохтоохторун бука барыларын сүрэхтэрин, илиилэрин сылааһа кэлэргэ дылы. Махтанабыт биһиги Бэрэсидьиэммитигэр, бырабыыталыстыбабытыгар, РФ Култууратын министиэристибэтигэр! Тыйаатыр сылынан бука барыгытын ис сүрэхпиттэн эҕэрдэлиибин! Итиэннэ эстэпиэтэни илдьэ кэлбит Чукотка бэрэстэбиитэллэрин аны сайын саха омук национальнай бырааһынньыгар — Ыһыахпытыгар күндү ыалдьыт буоларгытыгар ыҥырабын! —диэтэ бу бэлиэ түгэҥҥэ Саха Өрөспүүбүлүкэтин култууратын миниистирэ Юрий Куприянов уонна “Эргырон” судаарыстыбаннай ансаамбыл дириэктэрэ Виктор Цвигуҥҥа эҕэрдэ чороонун туттарда.
Харда тылыгар Виктор Цвигун Саха сирин дэлэгээссийэтин ыаллыы Чукоткаҕа ыҥырда.
—Тыйаатыр култууралары сомоҕолуур. Төһөнөн элбэх киһи Тыйаатыр сылын бэлиэтин тутар да — соччонон бу сиргэ олохпут тупсар!, — диэтэ кини.
Александр Лобанов салайааччылаах А.С.Пушкин аатынан Нуучча академическай тыйаатырын труппата, бу күн бэйэтин сценатыгар “Эргырон” чукотскай-эскимосскай судаарыстыбаннай ансаамбылы көрсөн баран, олунньу 17 күнүгэр театральнай марафон эстэпиэтэтин Чита куоракка туттарыаҕа.
Забайкальеҕа Нуучча тыйаатыра бастыҥ испэктээктэрин көрдөрүөҕэ: В.Федоров “Два берега одной победы”, А.Пушкин “Капитанская дочка”, Э.Скарпетта “Голодранцы и аристократы” уонна оҕолорго анаан Ю.Энтин, В.Ливанов “Бременские музыканты”.
Бу күн бастакы аҥаарыгар ыалдьыттарбыт — РФ култууратын министиэристибэтин Гастроллары өйүүр киинин бырагыраамаларын куратора Наталья Афанасьева, “Эргырон” судаарыстыбаннай ансаамбыл дириэктэрэ Виктор Цвигун уонна А.С.Пушкин аатынан Нуучча тыйаатырын дириэктэрэ Александр Лобанов, СӨ култууратын миниистирин солбуйааччы Марина Силина пресс-кэмпириэнсийэ биэрдилэр.
Оттон Былатыан Ойуунускай аатынан Саха академическай тыйаатыра бэҕэһээ Сахалиҥҥа, “Азия оҕолоро” Норуоттар икки ардыларынааҕы күрэхтэһии култуурунай бырагырааматын чэрчитинэн, “Хаарыан хампа күөх кытылым” испэктээгин улахан ситиһиилээхтик көрдөрдө.
Театральнай марафон иитинэн Саха тыйаатыра, ТЮЗ, Мииринэй тыйаатыра Кэбээйигэ, Уус Алдаҥҥа, Мииринэйгэ бэйэлэрин бастыҥ испэктээктэрин оонньуохтара.
Үөрүүлээх тэрээһин кыттыылаахтарын «Эргырон» чукотскай-эскимосскай ансаамбыл «Туундара мелодията» диэн дьүһүйүүтүнэн эҕэрдэлээтэ.
Татьяна МАРКОВА, «Саха сирэ» хаһыат, edersaas.ru
Ааптар хаартыскаҕа түһэриилэрэ.