Саха сирэ тыа сирин сирин-уотун кэлимсэ сайыннарыы бырагырааматын үбүлээһин кээмэйинэн Арассыыйаҕа инники күөҥҥэ иһэр
Саха сиригэр “2020-2024 сылларга тыа сирин сирин-уотун кэлимсэ сайыннарыы” судаарыстыба бырагырааматын олоххо киллэриигэ 2022 сыллаахха 1,3 млрд солкуобайтан тахса үп көрүлүннэ. Бу дойду үрдүнэн саамай үгүөрү үбүлээһин. Быйыл бырагырааманан өрөспүүбүлүкэ оройуоннарыгар 13 оскуоланы уонна успуорт эбийиэктэрин үлэҕэ киллэриэхтэрэ. Бу туһунан бырабыыталыстыба отчуотун кэмигэр быһа эфиргэ өрөспүүбүлүкэ вице-премьерэ Михаил Никифоров иһитиннэрдэ.
Бу иннинэ Саха сирин баһылыга Айсен Николаев тыа сирин сирин-уотун кэлимсэ сайыннарыы бырагыраамата өрөспүүбүлүкэ тыатын сиригэр дьон олоҕун тупсарыыга туһуламмытын бэлиэтээбитэ.
2022 сылга бырагырааманан хапытаалынай тутуу 13 эбийиэгин тутан киллэрэргэ соруналлар — 4 уһуйааны (Үөһээ Бүлүү, Бүлүү, Сунтаар, Уус Алдан улуустарыгар), 3 оскуоланы (Бүлүү, Уус Алдан, Хаҥалас улуустарыгар), 2 уһуйаан-оскуоланы (Эдьигээн уонна Чурапчы улуустарыгар), култуура-успуорт комплексын уонна сөтүөлүүр бассейннаах успуорт комплексын (Үөһээ Бүлүү, Сунтаар оройуоннарыгар), Чурапчы улууһугар тыа сирин сайдыытын киинин.
Маны тэҥэ 10 тэрээһини олоххо киллэриэхтэрэ. Ол курдук, Нам улууһугар успуорт саалатын хапытаалынайдык өрөмүөннүөхтэрэ, Сунтаар оройуонугар уулуссаҕа уоту тардыахтара, Сунтаар, Уус Алдан уонна Чурапчы улуустарыгар доруобуйа харыстабылын, култуура, үөрэхтээһин эбийиэктэригэр тырааныспар 8 тэрилин ылыахтара.
Чурапчы улууһун Мындаҕаайы сэлиэнньэтигэр 2023 сыллаахха үлэҕэ киириэхтээх 120 миэстэлээх оскуоланы тутуу саҕаланыаҕа.
Саха сиригэр тыа сирин сирин-уотун кэлимсэ сайдыытын саҥа судаарыстыбаннай бырагырааматын олоххо киллэрии 2020 сылтан саҕаламмыта. Өрөспүүбүлүкэ Тыатын хаһаайыстыбатын министиэристибэтэ муниципальнай тэриллиилэри кытта ыкса ситимнээхтик сайаапканы түһэрэр документацияны торумнуур.
Санаттахха, тустаах бырагыраама бастакы сылыгар 2 млрд солкуобай кэриҥэ ыытыллыбыта, иккис сылга – 2,1 млрд солкуобай. 2021 сыл түмүгүнэн хапытаалынай тутуу 12 эбийиэгэ үлэҕэ киирдэ. Тыа сиригэр дьон олоҕун тупсарыыга туһуламмыт 16 тэрээһин олоххо киирдэ.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Бэлэмнээтэ Женни Стрюкова
Хаартыска: тустаах саайтан