Саха сирэ Russian Travel Awards туризмҥа бүтүн Арассыыйатааҕы бириэмийэ «Гастрономическай туризм сирэ-уота» номинациятыгар түмүк кыайыылааҕынан ааттанна.
Бу номинация түмүк кыайыылаахтарынан ону сэргэ Санкт-Петербург уонна Ростов уобалаһа буоллулар. Олунньу 24 күнүгэр Санкт-Петербурга буолбут публичнай билиһиннэрии түмүктэринэн Саха сирэ 2-с истиэпэннээх лауреат буолла.
Түмүккэ барыта 32 эрэгийиэн бэрэстэбиитэллэрэ кытыннылар. Саха сирэ бэйэтин гастрономическай туризмы өйүүргэ уонна сайыннарарга кыахтаах эрэгийиэн быһыытынан билиһиннэрдэ.
СӨ Предринимательствоҕа министиэристибэтин туризмҥа индустриятын отделын салайааччы Тамара Соловьева маннык иһитиннэрдэ:
«Биһиги туризмҥа баар хайысхаларбытын кэпсээтибит. Туристар саха куукунатын арааһын, ол иһигэр Ыһыах бырааһынньыгын уонна сыл аайы ыытыллар «Вкус Якутии» бэстибээли билэллэрин курдук, биһиэхэ баар туризм хайысхаларын билиһиннэрдибит. Билиһиннэрии бүтүүтэ ресторатор Иннокентий Лукин Саха сирин күөлүн чыыр балыгын быһан уонна боруобалатан көрдөрдө.
БЫҺААРЫЫ:
Russian Travel Awards туризмҥа бүтүн Арассыыйатааҕы бириэмийэ дойду туризмын уонна ыалдьытымсах буолуу индустриятын сайыннарар уонна өрө таһаарар хайысхалаах. Бириэмийэ ааспыт сыл түмүктэринэн туттарыллар. Тэрийээччилэр -– Санкт-Петербург туризмы сайыннарыыга кэмитиэтэ (туризмҥа федеральнай агентство өйөбүлүнэн).
Надежда ЕГОРОВА, «Саха сирэ», edersaas.ru