Саха сирэ цифровой биэриигэ эһиил бэс ыйын 3 күнүттэн көһүөҕэ
Арассыыйа Федерациятын цифровой сайдыыга, сибээскэ уонна маассабай коммуникацияларга министиэристибэтэ Арассыыйа субъектарыгар уопсай туһаныллар булгуччулаах аналоговай биэриини түһүмэхтэринэн араарыы былаанын бигэргэппитин туһунан иһитиннэрдэ.
Саха сиригэр федеральнай ханааллары цифровой биэриигэ көһөрүү кэлэр сыл бэс ыйын 3 күнүттэн былааннаммыта — диэн СӨ инновацияларга, цифровой сайдыыга уонна инфокоммуникационнай технологияларга министиэристибэтин саайта иһитиннэрэр.
Арассыыйа гражданнарын цифровой тэлэбиидэнньэҕэ муҥутуур табыгастаахтык көһөрөргө телеараадьыйанан биэриини сайыннарыыга бырабыыталыстыба хамыыһыйата булгуччулаах уопсай туһаныллар телеханааллар аналоговай биэриилэрин тохтотуу күнүн-дьылын бигэргэттэ, диэн биэдэмистибэҕэ иһитиннэрдилэр. 2019 сылтан тохсунньу ыйтан бэс ыйыгар диэри (олунньу 11 күнэ, муус устар 15 күнэ уонна бэс ыйын 3 күнэ) аналоговай телеканааллары көрдөрүүттэн цифровой тэлэбиидэнньэҕэ регион көһүүтүн туһунан информационнай экраны трансляциялааһын ыытыллыаҕа. Информационнай экран нэдиэлэ устата көстүөҕэ, ити кэнниттэн передатчик араарыллыаҕа.
Бүгүн Саха сиригэр икки мультиплекс цифровой биэриитэ Дьокуускай, Мирнэй, Нерюнгри куораттарга, Тиксиигэ көстөр. Сэтинньи 30 күнүттэн Саха сиригэр Алдан, Кэбээйи, Нерюнгри, Уус Маайа уонна Хаҥалас оройуоннарыгар иккис мультиплексы тестовай көрдөрүү саҕаламмыта. 2018 сыл бүтүөр диэри эфирнэй сирдээҕи теле-биэрии зонатыгар хапсар өрөспүүбүлүкэ бары олохтоохторугар 20 эфирнэй тэлэбиидэнньэ ханаалын цифровой көрүҥүнэн босхо көрөр кыахтаныахтара. Онон куорат уонна тыа сирин олохтоохторун сонуннары киэҥник тарҕатар сириэстибэлэргэ тэҥэ суох буолууларын кыһалҕата быһаарыллыаҕа.
Санатан эттэххэ, Саха сиригэр 211 цифровой ыстаансыйа тутуллуоҕа уонна үлэлиэҕэ. Сыл устата кинилэр цифровой сигналынан регион 95 % тахса олохтооҕун хааччыйыахтара. Олохтоохтор 5 % “Орион” (Телекаарта эргиэн маарката) уонна “НТВ-ПЛЮС” телеханааллар босхо пакеттарыгар холбонуохтарын сөп.
«Саха сирэ» хаһыат, edersaas.ru