2022 сылга федеральнай бүддьүөттэн саҥа суоллары тутарга уонна өрөмүөннүүргэ хаһаас пуондаттан 120 миллиард солкуобай көрүллүөҕэ. Бырабыыталыстыба бэрэссэдээтэлэ Михаил Мишустин муус устар 22 күнүгэр таһаарбыт уурааҕар Саха сирэ эмиэ киирэ сылдьар.
Ол курдук, 63 эрэгийиэҥҥэ эрэгийиэннээҕи суолу-ииһи өрөмүөннүүргэ уонна саҥардыыга диэн 86 миллиард солкуобайы көрбүттэр. Саамай уһун суолу – 400 килэмиэтири Саратовскай уобаласка оҥоруохтара. Оттон Волгоград куоракка Волга өрүһү туоруур муостаны тутуу салҕанар.
Өссө 34 миллиард солкуобай федеральнай суоллары тутууга, хапытаалынай өрөмүөҥҥэ барыаҕа. Бу үп Европа-Арҕаа Кытай уонна Казань-Екатеринбург хайысхаларынан, ону тэҥэ, “Золотое кольцо” куораттарын ситимниир суоллары оҥорууга туттуллуоҕа.
Оттон Саха сиригэр “Куттала суох уонна хаачыстыбалаах суоллар” национальнай бырайыак чэрчитинэн, эрэгийиэннээҕи суоллары оҥорууга 1 миллиард солкуобай кэлиэҕэ.
—Үөрүүлээх сонуну үллэстэбин, бырабыыталыстыба бэрэссэдээтэлэ Михаил Мишустиҥҥа өйөбүлүн иһин махтанабын! Бу быһаарыы өрөспүүбүлүкэ суолга-иискэ инфраструктуратын түргэнник тупсарар кыаҕы биэрэр, — диэн Ил Дархан Айсен Николаев социальнай ситимнэргэ суруйда.
Ангелина Васильева, “Саха сирэ” хаһыат, edersaas.ru
Хаартыска: СИА.