Саха сирэ социальнай эбийиэктэри тутууга 5 млрд солкуобайы ылыаҕа

Саха сирэ социальнай эбийиэктэри тутууга 5 млрд солкуобайы ылыаҕа.

Бу туһунан от ыйын 25 күнүгэр ыытыллыбыт Уһук Илин федеральнай уокуругар киирэр субъектар экэниэмикэлэрин сайыннарыыга социальнай кииннэргэ эбии үбү көрүүгэ анаммыт Арассыыйа Федерациятын бырабыыталыстыбатын мунньаҕар билиннэ.
Арассыыйа бырабыыталыстыбатын бэрэссэдээтэлэ Дмитрий Медведев федеральнай бүддьүөттэн 15,5 млрд солкуобайы Уһук Илин биэс эрэгийиэнигэр – Саха сиригэр, Приморскай кыраайга, Магадан уобалаһыгар, Сахалиҥҥа уонна Еврейскэй автономнай уобаласка эбии биэриэхтэрэ диэтэ. Ити үптэн 5 млрд солкуобай Саха сиригэр көрүллүөҕүн туһунан иһитиннэрдэ.
“Бу үп үс сыл устата киириэҕэ. 10 млрд солкуобай кэриҥэ быйыл түһүөҕэ. Эбии үп инженернэй уонна тырааныспар инфраструктуратыгар, балыыһалары, оскуолалары, спорт комплекстарын киллэрэн туран, социальнай эбийиэктэри тутууга ананыаҕа”, — диэн премьер бэлиэтээтэ.
Мунньахха тыл этэригэр Айсен Николаев Саха сирэ Уһук Илин экэниэмикэтин сайыннарыыга инники күөҥҥэ иһэрин, оттон 2018 сыл түмүгүнэн макроэкэнэмиичэскэй сүрүн көрдөрүүлэринэн эрэгийиэн Арассыыйаҕа 11 миэстэҕэ иһэрин бэлиэтээтэ. Ол эрээри экэниэмикэ сайдыыта нэһилиэнньэ олоҕун уйгутугар, аныгы социальнай уонна инженернэй инфраструктураларга күрэстэһиини ирдиир диир.
Өрөспүүбүлүкэ салайааччыта федеральнай бүддьүөттэн эбии ассигнованиены көрүү Саха сиригэр үс социальнай суолталаах эбийиэги тутууну саҕалыырга кыаҕы биэриэ диэн эбэн эттэ. Бу Кангаласс микрооройуонугар оскуола-дьыссаат, “Хотугу сулус” сылы эргиччи үлэлиир оҕо сынньалаҥ уонна чэбдигирэр киинэ, 150 куойкалаах өрөспүүбүлүкэтээҕи кардиологическай киин. Бу киини тутуу “Доруобуйа харыстабыла” национальнай бырайыак тутаах көрдөрүүлэрин ситиһэргэ төһүү буолуоҕа уонна 2024 сылга нэһилиэнньэ сүрэх-тымыр ыарыыларыттан өлүүтүн 23 бырыһыанынан аччатыаҕа.
РФ бырабыыталыстыбатын бэрэссэдээтэлэ Дмитрий Медведев Саха сирин баһылыгын этиитин өйөөтө, өрөспүүбүлүкэ бэриллибит үбү-харчыны туттууну кытаанахтык хонтуруоллуо уонна былааннаабыт эбийиэктэрин болдьоҕор киллэриэ диэн эрэнэрин биллэрдэ.

Саха Өрөспүүбүлүкэтин Ил Дарханын уонна Саха Өрөспүүбүлүкэтин бырабыыталыстыбатын пресс-сулууспата.