Саха сирэ пандемия хааччаҕын кэмигэр култуура тэрилтэлэрэ хайдах үлэлиир уопуттарын үллэһиннэ.
СӨ култууратын уонна духуобунай сайдыытын миниистирэ Юрий Куприянов видео-сибээһинэн РФ Судаарыстыбаннай Сэбиэтин уочараттаах мунньаҕар «Култуура» хайысхаҕа кыттыыны ылла.
Мунньахха пандемия хааччаҕын кэмигэр култуура тэрилтэлэрэ хайдах быһыылаахтык үлэлииллэрин тула кэпсэтии буолла. Саха сирэ манна бэйэтин уопутун үллэстэр үс субъектан биирдэстэрэ буолла. Юрий Куприянов дистанционнай киэбинэн ыытыллар тэрээһиннэр тустарынан иһитиннэрдэ. Хаачахтаныы миэрэлэрэ култуура тэрилтэлэригэр дьайыылара күүстээх. Онон култуура тэрилтэлэригэр дьон сылдьыыта аҕыйаан, ити дохуот киириитигэр эмиэ охсуулаах. Ол эрээри миниистир бэлиэтииринэн, тэрилтэлэргэ онлайн тэрээһини тэрийиигэ үгүс сайаапка киирэр буолбут. Бу сыл былаан быһыытынан 12, 1 мөлүйүөн ахсааннаах култуура тэрилтэлэригэр сылдьыы былааннаммыт. Ол эрээри, тохсунньу-алтынньы ыйдарга сыыппаранан 11,7 мөлүйүөн сылдьыы ааҕыллыбыт. Ол эбэтэр былаантан 96% буолбут. Саха сирэ дойду уон бастыҥ иһигэр киирэр. Ол курду,к саҥа куормаҕа өрөспүүбүлүкэ бибилэтиэкэлэрэ үчүгэйдик киирбиттэр. Оттон мусуойдар ахсааннарыгар национальнай уус-уран мусуой бастыҥ иһигэр киирбит. Өрөспүүбүлүкэ култууратын тэрилтэлэрэ министиэристибэҕэ үп өттүнэн өйөбүлүгэр махтаналлар.
Биһиги 129 мөлүйүөн солкуобайы төннөрүллүбэт кирэдьиит ыллыбыт. Ол түмүгэр култуура үлэһиттэригэр сарбыйыы буолбата. Онон бу өйөбүл бу сылтан саҥалыы күүһүнэн үлэлииргэ кыах биэрдэ, — диэн этэр култуура миниистирэ Юрий Куприянов.
Ульяна ЗАХАРОВА.