Илиҥҥи экономическай форумҥа Ил Дархан Айсен Николаев Уһук Илин, Арктика сайдыыларын миниистирэ Алексей Чекункову, “Росатом” судаарыстыбаннай корпорация генеральнай дириэктэрин Алексей Лихачеву кытары Саха сиригэр кыра кыамталаах атомнай ыстаансыйалары тутарга дуогабар түһэристилэр.
Бу ыстаансыйалары тутуу Саха сирин хотугу улуустарыгар саҥа тыыны киллэриэхтээх. Ыстаансыйа, бастатан туран, Усуйаана улууһугар тутуллуохтаах. Айсен Николаев бэлиэтииринэн, ыстаансыйалары саҥардыы улуустар социальнай-экономическай сайдыыларыгар төһүү күүс буолуохтаах.
– Бу бырайыагы таас чоҕунан, дизелинэн оттуллар оһохтору уларытыы эрэ курдук көрбөккө, киэҥник ылыахха наада. Бастатан туран, бу бырайыак Уус Куйга бөһүөлэгин, Усуйаана улууһун, итинэн сиэрдээн Саха сирин Арктикатын бүтүннүүтүн сайыннарар. Саҥа кэм ыстаансыйата хотугу улуустарга бырамыысыланнаһы сайыннарыыга төһүү буолуоҕа. Хорҕолдьуну, кыһыл, үрүҥ көмүстэри хостооһуҥҥа барытыгар. Ону таһынан нэһилиэнньэ олоҕо тупсарыгар туһуламмыт бырайыак буолар, – диэн бэлиэтиир кини.
Дуогабары оҥорсуу Саха сирин хотугу улуустарын, Арктикатын сайыннарыы биир кэлим былаанын чэрчитинэн барда. Улуус уотун, энергетикатын күүһүрдүү таһынан манна суолу-ииһи, социальнай инфраструктураны тупсарыы киирдэ.
“Росатом” генеральнай дириэктэрэ Алексей Лихачев: “Илиҥҥи экономическай форумҥа саҥа докумуоннарга илии баттаһыы үтүө үгэскэ кубулуйан эрэр. Санатан эттэххэ, биһиги 2018 сылтан саҕалаан Арассыыйа хотугу оройуоннарыгар кыра кыамталаах атомнай ыстаансыйалары тутууга үлэлэһэбит. Бу тулалыыр эйгэни харыстааһыҥҥа, күүстээх, кыамталаах уоту биэриигэ туһуланар бырайыак буолар”, – диэн бэлиэтиир.
Аграфена КУЗЬМИНА