Саха сирэ “Үөрэх” национальнай бырайыагы толорууга бастыҥнар кэккэлэригэр киирдэ
Аҕыйах хонуктааҕыта РФ Үөрэҕириитин миниистирэ Сергей Кравцов кэллиэгийэ кэмигэр “Үөрэх” национальнай бырайыагы ханнык эрэгийиэннэр олоххо хото киллэрэн, ханныктар хаалан иһэллэрин билиһиннэрбит. Саха Өрөспүүбүлүкэтэ “күөх” зонаҕа киирбит. Ити туһунан тустаах министиэристибэ саайтыгар суруллар.
Миниистир “Үөрэх” национальнай бырайыак үлэтин 90-100 бырыһыан толорон иһэр эрэгийиэннэри ааттаталаата. Ол курдук, “күөх” зонаҕа Тамбовскай уобалас, Хотугу Осетия Өрөспүүбүлүкэтэ – Алания, Приморскай кыраай, Мурманскай уобалас, Чечен Өрөспүүбүлүкэтэ, Псковскай уобалас, Саха Өрөспүүбүлүкэтэ, Волгоградскай, Самарскай уобаластар, Ненецкэй автономнай уокурук, Тюменскэй уобалас, Ингушетия Өрөспүүбүлүкэтэ, Свердловскай уобалас, Ставропольскай кыраай киирбиттэр.
Оттон муус устар 1 күнүгэр диэри куонкуруһу биллэриэхтээх эрээри, ый бүтүүтүгэр диэри хамсана илик “кыһыл” зонаҕа Астраханскай уобалас, Дагестан Өрөспүүбүлүкэтэ, Тверскай уобалас, Алтайскай кыраай, Курганскай, Костромской, Новосибирскай, Воронежскай уобаластар, Удмуртия Өрөспүүбүлүкэтэ, Еврейскэй автономнай уобалас, Севастополь, Чувашия Өрөспүүбүлүкэтэ, Рязанскай, Ленинградскай уобалас, Коми Өрөспүүбүлүкэтэ бааллар. Сиһилии РФ Үөрэҕириигэ министиэристибэтин саайтыгар көрүөххүтүн сөп.
“Саха сирэ” хаһыат, edersaas.ru