Уопсастыба

Саха сирэ үрдүк технологиялары сайыннарарга инники иһэр

Өрөспүүбүлүкэбит ИТ-оҥорооччулара саха тылын харыстабылыгар көхтөөхтүк ылсаллар.

«Сыыппараҕа көһөрүү төрүт тыллар харыстабылларыгар саҥа кыахтары биэрэр. Ол курдук, төрөөбүт тылларынан интэриниэт-ресурстар, ол иһигэр, биһиги ИТ-пааркабыт резиденнэрэ кытталлар. Бу үлэҕэ наука, үөрэх, култуура элбэх бэрэстэбиитэлэ тардыллаллар», -– диэн СӨ Ил Дархана Айсен Николаев бэлиэтиир.
Ону таһынан Уһук Илиҥҥэ РФ бэрэсидьиэнин боломуочуйалаах бэрэстэбиитэлэ Юрий Трутнев Саха сиригэр кэлэ сылдьан, Саха Өрөспүүбүлүкэтэ үрдүк технологиялары сайыннарарга инники иһэрин бэлиэтээбитэ.
Эрдэ иһитиннэрбиппит курдук, ИТ-паарка резиденэ, «Квантум» хампаанньа төрөөбүт тылынан саҥарар Арассыыйаҕа бастакы сыһыарыыны оҥорон билиһиннэрдэ. «Айарбуук» электроннай бибилэтиэкэ 500-тэн тахса электроннай уонна аудио-кинигэлээх. Ону AppStore и GooglePlay билсиэххэ сөп.
Өрөспүүбүлүкэҕэ AYANA нууччалыы-эбэҥкилии саҥарар тылбаасчыт оҥоһулунна. Бырайыак эбэҥки тылын сайыннарарга ананар. Инникитин аҕыйах ахсааннаах төрүт омуктар атын тылларыгар сыһыарыыны оҥоруу былааннанар.
2020 сыллаахха саха тылын Яндекс сиэрбиһигэр киллэрбиттэрэ. Ол эбэтэр ханнык баҕарар саха тылын эбэтэр этиилэрин аан дойду 98 тылыттан бииригэр тылбаастыахха сөп.
Билигин Гуманитарнай чинчийиилэр уонна Хотугу сир аҕыйах ахсааннаах норуоттарын проблемаларын институтугар саха тылын улахан быһаарыылаах тылдьытын электроннай көрүҥүн пуондата эрэ буолбакка, терминология тылдьыта, морфологическай анализатор киллэриллэр пуондатын тэрийэргэ киэҥ хабааннаах үлэ ыытыллар. Маннык пуондалар эбэҥки, эбээн уонна дьүкээгир тылыгар эмиэ оҥоһуллуохтара.

Надежда ЕГОРОВА, «Саха сирэ» хаһыат, edersaas.ru

Мария ВАСИЛЬЕВА (СИА) хаартыскаҕа түһэрииитэ

0
0
Telegram Whatsapp