Саха сирэ оҕо төрөөһүнүнэн Уһук Илиҥҥэ бастаан иһэр, онтон дойдуга алтыс миэстэҕэ сылдьар. Ааспыт сылга өрөспүүбүлүкэҕэ 12 024 оҕо төрөөбүтэ. Саҥа төрөөбүт оҕолору уонна дьиэ кэргэттэри көҕүлүүргэ, кинилэргэ олорорго сөптөөх усулуобуйаны тэрийэргэ өрөспүүбүлүкэ салалтата туһааннаах көмөнү уонна өйөбүлү оҥорор.
Быйыл, өрөспүүбүлүкэ төрүттэммитэ 100 сылыгар, төрөөбүт оҕолорго «Сүүс сыл оҕолоро» тус сыаллаах хапытаал туттарыллар.
Ону таһынан СӨ Ил Дархана Айсен Николаев сорудаҕынан, дьиэ кэргэн өйөбүлүгэр кэккэ дьаһаллар ыытыллаллара былааннанар. Ол иһигэр:
— 5 уонна онтон элбэх оҕолоох дьиэ кэргэттэр дьиэ атыылаһалларыгар төлөбүр;
— 5 уонна онтон элбэх оҕолоох дьиэ кэргэттэри баайга-дуолга нолуоктан босхолооһун;
— оҕолору иитэ ылбыт дьиэ кэргэни наҕараадалааһын базовай кээмэйин икки төгүл улаатыннарыы.
Бу туһунан СӨ үлэҕэ уонна социальнай сайдыыга миниистири бастакы солбуйааччы Иван Алексеев тохсунньу 5 күнүгэр саҥа төрөөбүт кырачааннары балыыһаттан таһаарыы үөрүүлээх сиэригэр-туомугар иһитиннэрдэ.
Надежда ЕГОРОВА, «Саха сирэ», edersaas.ru