Маны аах Үөрэх уонна наука

Саха сирэ норуоттар икки ардыларынааҕы Интеллектуальнай оонньууга бэлэмнэнэр

Бэс ыйыгар Дьокуускайга олоҕурбут көрүҥүнэн «Yakutia International Science Games-2022» норуоттар икки ардыларынааҕы Интеллектуальнай оонньуу ыытыллыаҕа. Үс сүрүн тэрээһинтэн турар: STEM-бырайыактарынан норуоттар икки ардыларынааҕы чинчийэр оскуола, оскуола үөрэнээччилэрин билимҥэ чинчийэр кэмпириэнсийэ-куонкурустара уонна математикаҕа, физикаҕа, химияҕа, информатикаҕа үгэскэ кубулуйбут “Туймаада” олимпиада.

edersaas.ru

Үүнэр көлүөнэ тус сыаллаах пуондатын генеральнай дириэктэрэ, Оонньуу тэрийэр кэмитиэттэрин бэрэссэдээтэлин солбуйааччы Владимир Егоров иһитиннэрбитинэн, билигин бастакы тэйиччиттэн түһүмэх түмүктэнэн эрэр. Онно Арассыыйа 80 эрэгийиэниттэн итиэннэ тас дойдулартан 1 200-тэн тахса оҕо кытта сылдьар. Кыттааччылар тиэмэлэринэн хайысхалаах (айылҕа, тыыннаах уонна тыыммат айылҕа хардарыта дьайсыыта, киһи уонна уопсастыба) чинчийэр толкуйдарын олоххо киллэрэн, тулалыыр эйгэлэрин үөрэтэн, аһаҕас тииптээх сорудахтары толордулар.

“Эспэртиисэҕэ, уопсайа, 2 500-тэн тахса тэттик чинчийии түмүгүн киллэрбиттэрэ. Бу күннэргэ бүтэһиктээх түмүгү таһаарыахпыт.

Дьокуускайга олоҕурбут көрүҥүнэн ыытыллар тэрээһин туһунан эттэххэ, уонча дойдуттан уонна Арассыыйа 20 эрэгийиэниттэн 300-тэн тахса оскуола үөрэнээччитэ кыттара былааннанар. Талааннаах оҕолор үөрэх ураты былаһааккатыгар бэйэ-бэйэлэрин кытта билсэллэр, күрэхтэһэллэр, өйүктэрин (идея) үллэстэллэр, кыттыгас бырайыактары тобулан үлэлииллэр. Бу курдук уопсай интэриэстэринэн кыраларыттан бииргэ үлэлииллэрэ айымньылаах сайдыыга бөҕө үктэл буолар”, — диэн бэлиэтээтэ Егоров.

Санатан эттэххэ, Норуоттар икки ардыларынааҕы I Интеллектуальнай оонньуу 2018 сыллаахха, 40-тан тахса тас дойду уонна Арассыыйа 18 эрэгийиэнэ кыттыылаах Дьокуускайга ыытыллыбыта. Быйылгы Норуоттар икки ардыларынааҕы Интеллектуальнай оонньуу билимҥэ чинчийиинэн дьарыктанар, билим, тиэхиньикэ уонна технология ситиһиитин сэҥээрэр талааннаах үөрэнээччилэргэ, тохтобула суох үөрэх-коммуникационнай былаһааккатын тэрийэр уонна сайыннарар соруктаах.

 

Интеллектуальнай оонньуу-2022 пресс-киинэ.

0
0
Telegram @edersaas20