Маны аах Уопсастыба

Саха сирэ үлэ миэстэтин таһаарыыга инники күөҥҥэ сылдьар  

Бүгүҥҥүттэн Саха сиригэр “Траектория карьеры” диэн эдэр дьоҥҥо аналлаах II өрөспүүбүлүкэтээҕи үлэ дьаарбаҥката саҕаланна. Тэрээһин быһа сибээһинэн ыытыллыаҕа.

Дьаарбаҥка аһыллыытыгар Ил Дархан уонна бырабыыталыстыба дьаһалтатын салайааччы Афанасий Владимиров кыттыыны ылла. Кини бэлиэтииринэн, төһө да билигин дьаҥ-дьаһах туран, хамсык кэмэ буоллар, нэһилиэнньэни үлэнэн хааччыйыы көрдөрүүтэ үрдүү турар. Холобур, 2017 сыллаахха дьарыктаах дьон ахсаана 417 тыһыынча эбит буоллаҕына, быйыл элбээн 469,9 тыһыынча киһи буолбут. Үлэтэ суох сылдьар киһи ахсаана кыччаан, билигин бу көрдөрүү 6,6 % тэҥнэспит. Эрдэ 7,7 % этэ.

Манна даҕатан эттэххэ, үлэһит киһи ахсааныттан 35 % эдэр дьон ылаллар. Билигин ыччаты үлэнэн хааччыйыыга биһиги өрөспүүбүлүкэбитигэр да, Арассыыйа да үрдүнэн элбэх бырагыраама баар. Улахан хампаанньалары кытары кэпсэтии баран, эдэр дьон үөрэхтэрин кэмигэр стажировка бараллар. Ити түмүгэр билигин 69 тэрилтэҕэ 350 эдэр исписэлиис үлэҕэ киирдэ. Ону таһынан тэрилтэлэр, биэдэмистибэлэр икки ардыларыгар үлэ ыытыллан, үрдүк, орто үөрэҕи бүтэрбит 9 тыһыынчаттан тахса исписэлиис сылын аайы үлэнэн хааччыллан иһэр.

“Бырамыысыланнаска – олохтоох үлэһиттэри” бырайыак чэрчитинэн, 30 тыһыынчаттан тахса киһи үлэ миэстэтин булуммута. Итинтэн 13 тыһыынчата эдэр дьон буолаллар.

Афанасий Владимиров этэринэн, 2016 сыллаахха “Импульс” диэн эдэр дьоҥҥо үлэ миэстэтин тэрийиигэ анаммыт тэрээһин билигин үчүгэй түмүктэри көрдөрөн эрэр. Бу бырагыраама чэрчитинэн, Нэһилиэнньэ дьарыктаах буолуутун сулууспатын иһинэн “Саҕалааһын – ситиһии төрдө” диэн бырайыак үлэлиир. Икки сыл иһигэр номнуо 2 тыһыынчаттан тахса эдэр дьон анал идэҕэ үөрэннилэр, кинилэртэн 800 исписэлииһэ үлэтин миэстэтин булуммута.

– Үлэ дьаарбаҥката эдэр дьон дьарыктаах буолууларыгар, тэрилтэлэр исписэлииһинэн хааччыллыыларыгар төһүү буолар. Мин саныахпар, кэлиҥҥи сылларга эдэрдэр үөрэхтэрин кэнниттэн үлэҕэ киириилэрэ элбээн иһэр. Манна өрөспүүбүлүкэ саҥа үлэ миэстэтин таһаарыыга араас бырайыагы киллэрэрэ улахан оруоллаах. Биһиги өрөспүүбүлүкэбит ити хайысханан Уһук Илин эрэгийиэннэригэр инники күөҥҥэ сылдьар, – диэн бэлиэтиир Афанасий Семенович.

Дьаарбаҥка кыттыылаахтара хампаанньалар бэрэстэбиитэллэрин кытары быһа сибээһинэн холбонон кэпсэтиэхтэрэ, ону таһынан семинардарга кыттыахтара.

Аграфена КУЗЬМИНА

0
0