Саха сирэ кыһыҥҥы суолунан таһаҕаһы тиэйии былаанын 87% тахса толордо

Ааптар: 
Бөлөххө киир:

Билигин Саха сиригэр массыынанан 707 тыһыынча туонна таһаҕас тиэрдилиннэ (87,2%). Бу ас-үөл табаара, таас чох, ньиэп бородууктата уонна атын олоҕу хааччыйар таһаҕас. Бу туһунан өрөспүүбүлүкэ Бырабыыталыстыбатын Бэрэссэдээтэлэ Андрей Тарасенко бырабыыталыстыба чилиэннэрин, олоҕу-дьаһаҕы хааччыйар тэрилтэлэр салайааччыларын кытта ыыппыт мунньаҕар иһитиннэрдэ.

“Дьоһун сорук – хааччыйыы уонна энергетика эбийиэктэрин тохтоло суох үлэлииллэрин хааччыйыыга таһаҕаһы болдьоҕун иннинэ тиэрдии. Бу күннэргэ биһиги хомунаалынай комплекс ресурсаларын уонна хотугу таһаҕаһы тиэйии атын кыттыылаахтарын үбүнэн хааччыйыыга суһал быһаарыылары ылынабыт”, — диэбитэ бу иннинэ эрэгиийэн баһылыга Айсен Николаев.

Навигация кэмигэр уу намыһах таһыма бэлиэтэнэр оройуоннарыгар оттук-энергетика  ресурсаларын урутаан тиэйии тэрилиннэ. Бүлү умнаһынааҕы оройуоннарга таһаҕаһы кыһыҥҥы суолунан тиэрдэллэр.

“Сангаар-Ньурба хайысхатынан таас чоҕу тиэйии салҕанар. 24 массыына үлэлиир. Сангаар-Кэбээйи хайысхатынан кыһыҥҥы суол оҥоһуллубута. “СӨ ОДьКХ “ ГУП-ка эбии тиэхиньикэни кытыннарыыга сорук турбута”, — диэтэ Нэһилиэнньэ олоҕун-дьаһаҕын хааччыйыыга госкэмитиэтин салайааччыта Дмитрий Лепчиков.

Өрөспүүбүлүкэ геологияҕа министиэристибэтигэр “Якутуголь”  тэрилтэни кытта таас чоҕу хостооһуну улаатыннарыыга сорудахтаммыта. Сотору кэминэн “Дьабарыкы Хайа” таас чохтоох разреһыгар министиэристибэттэн  тустаах боппуруоһу быһаарыыга бөлөх тиийиэҕэ.

Тырааныспар министиэристибэтэ суол сулууспаларын кытта муус халыҥыттан көрөн таһаҕаһы тиэйии уйугун түһүмэхтэринэн аччатыаҕа. Күн-дьыл туругун учуоттаан, муус устар бастакы күннэриттэн саҕалаан киин оройуоннарга таһаҕас уйугун кээмэйин уонна Арктика оройоуннарыгар – муус устар 20 күнүттэн аччатыахтара.

Кыһыҥҥы суолунан 812 тыһ туонна таһаҕаһы тиэйии торумнанар. 727 тиэхиньикэ тиэйиинэн дьарыктанар.

Санаттахха, кулун тутар 25 күнүгэр вице-премьер-РФ Уһук Илиҥҥэ боломуочуйалаах бэрэстэбиитэлэ Юрий Трутнев Дьокуускайга хотугу таһаҕаһы тиэйиигэ мунньахтаабыта. Кини тиэйии кыттыылаахтарыгар кирэдьиит ыстаапкатын сорҕотун толуйууга өрөспүүбүлүкэ киллэрбит этиитин өйөөбүтэ. Юрий Трутнев Арассыыйа Үпкэ министиэристибэтигэр , РФ Уһук Илини сайыннарыыга министиэристибэтигэр эрэгийиэннэри кытта хотугу таһаҕаһы тиэйиигэ билигин туһаныллар уонна саҥа кирэдьииттэргэ бырыһыан ыстаапкатын субсидиялааһын муҥутуур кээмэйин чопчулуурга соруйбута.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата

Мария Васильева (СИА) хаартыската

Бэлэмнээтэ Женни Стрюкова

+1
0
+1
0
+1
0
+1
0
+1
0
+1
0
+1
0