2018 сылтан саҕалаан Арассыыйатааҕы Кореятааҕы эрэгийиэннэр икки ардыларынааҕы форум тэриллэн ыытыллар. Бу тэрээһин РФ бэрэсидьиэнэ Владимир Путин уонна Корея Өрөспүүбүлүкэтин бэрэсидьиэнэ Мун Чжэ Ина көҕүлээһиннэринэн барар. Быйылгы форум Кореяҕа Ульсан куоракка сэтинньи 3-5 күннэригэр ыытылынна.
Саха сирин дэлэгээссийэтин СӨ бырабыыталыстыбатын бэрэссэдээтэлин солбуйааччы Сергей Местников иилээн-саҕалаан илдьэ сырытта. Быйыл форум үһүс төгүлүн ыытыллар. Тэрээһиҥҥэ Корея 17, Арассыыйа 18 эрэгийиэннэриттэн барыта 800 киһи кыттыыны ылла. Ол иһигэр Уһук Илин федеральнай уокурук бары эрэгийиэннэрэ, Арассыыйа Арктикатын зонатыттан 7 эрэгийиэн кытынна.
Форум кэмигэр Арассыыйа уонна Корея салгыы үлэлиир хайысхаларын тосхолун ырыттылар. Ол иһигэр Саха сирин инвестиционнай бырайыактарын көрдүлэр. Ил Дархан Айсен Николаев бэлиэтииринэн, Корея Өрөспүүбүлүкэтин кытары дьыалабыай сыһыаны олохтооһун улахан суолталаах. “Биһиэхэ Кореяны кытары үлэлэһии суолтата улахан. Үлэбит хайысхатын кэҥээһинэ атыыны-тутууну, чуолаан сырьета суох бородууксуйаны экспортка таһаарарбыт, айти-технологияны, биоиндустрияны, доруобуйа харыстабылын, медицинскэй туризмы, үөрэхтээһини, култуураны, спорду кытары быһаччы сибээстээх”, – диэн бэлиэтээн турар кини II Арассыыйатааҕы Кореятааҕы форум кэмигэр.
Эрэгийиэннэр дэлэгээссийэлэрэ Корея Өрөспүүбүлүкэтин парламенын, провинциялар губернатордарын, куораттар баһылыктарын кытары көрүстүлэр. Ону сэргэ энергетикаҕа, Хотугу муустаах муоранан сырыы, ньиэп, гаас эйгэтигэр, доруобуйа харыстабылыгар кэпсэтиилэр таҕыстылар.
Саха сирэ Хвасун балыыһатын, Чоннам университетын медицинскэй оборудованиеҕа уонна биоконвергентнай технологияҕа киинин кытары сибээс олохтоото. Манна Саха сириттэн быраастар кэлэн үөрэнэн, уопут атастаһан барыахтара. Мудынсан национальнай пааркатын кытары меморандум түһэрсилиннэ. Бу докумуон чэрчитинэн, устудьуоннар, үөрэнээччилэр тулалыыр эйгэни харыстааһыҥҥа анал бырагырааманан үөрэҕи барыахтара. Ону сэргэ Саха сирин дэлэгээссийэтэ киинэ эйгэтигэр Корея бэрэстэбиитэллэрин кытары кэпсэттэ. Инникитин айар үлэһиттэр Саха сиригэр Кореяны кытары кыттыгас киинэ уһулар былааннаахтар.
Аныгыскы форум Арассыыйаҕа Южно-Сахалин куоракка ыытыллыаҕа.
Аграфена КУЗЬМИНА