Саха сиригэр «Кинигэ уонна ааҕыы эйгэтин территорията» бэлиэ туттарылынна

Дойду тэбэр сүрэҕэр, Москваҕа,  РФ Бэрэсидьиэнин култуура боппуруоһугар сүбэһитэ, нуучча тылын уонна литературатын преподавателлэрин норуоттар икки ардыларынааҕы ассоциацияларын  бэрэсидьиэнэ Владимир Толстой «Саамай ааҕар эрэгийиэн» Арассыыйатааҕы күөн күрэс  түмүгүнэн, СӨ Ил Дарханыгар Айсен Николаевка  «Кинигэ уонна ааҕыы эйгэтин территорията» анал аат бэлиэни үөрүүлээх быһыыга-майгыга туттарда.

«Кинигэ уонна ааҕыы эйгэтин территорията» 2019 сыллаахха олохтоммут. Бу «Саамай ааҕар эрэгийиэн» күрэс кыайыылааҕынан буолбут, кэнники биэс сылга испииһэккэ үстэ киирбит эрэгийиэҥҥэ туттарыллар. 2019 сыллаахха Санкт-Петербург уонна Ульяновскай уобалас кыайыылаахтарынан буолбуттара. 2020 сыллаахха Ульяновскай иккис төгүлүн үрдүк бэлиэни ылан турар. Быйыл дьүүллүүр сүбэ Саха сиригэр туттарарга быһаарда.

«Арктика ааҕар куйаара» бырайыакпытын тэрийээччилэр өйөөбүттэригэр махтанабыт. Аахсыйаҕа Арктикаҕа олорор нэһилиэнньэ үс гыммыт биириттэн ордуга хабылынна. Викториналары, куонкурустары, үөрэтэр, сырдатар тэрээһиннэри таһынан, Саха сирин төрүт олохтоох норуоттарын тылларын-өстөрүн билиигэ, тарҕатыыга улахан үлэ ыытыллар«, — диэтэ Ил Дархан.