Бэҕэһээ, тохсунньу 9 күнүгэр, Ил Дархан Айсен Николаев Саха сирин тустууга бэдэрээссийэтин саҥа састаабын кытта бастакы мунньаҕын ыытта. Манна быйылгы спортивнай күрэхтэһиилэри ырытыстылар, сыллааҕы былааны торумнаатылар. Итиэннэ сүрүн боппуруоһунан Дьокуускайга көҥүл тустууга Аан дойду кубогын ыытарга бэлэмнэниини кэпсэттилэр.
Айсен Николаев Саха сиригэр аан бастакы нүөмэрдээх спорт көрүҥэр — тустууга кулун тутарга буолар маннык улахан таһымнаах күрэхтэһиини ыытарга күүстээхтик бэлэмнэниэххэ наадатын бэлиэтээтэ.
«2019 сылга бэдэрээссийэ улахан соруктаах. Урукку өттүгэр буолбатах таһымнаах тэрээһин Дьокуускайга буолаары турар. Бу түгэн өрөспүүбүлүкэҕэ, Уһук Илиҥҥэ уонна бүтүн дойдуга улахан суолталаах. Күрэхтэһии үрдүк таһымнаах тэрээһиннээхтик ыытыллыахтаах«, — диэн тоһоҕолоон бэлиэтээтэ Ил Дархан.
Санатан эттэххэ, былырыын сайын Айсен Николаев Арассыыйа тустууга бэдэрээссийэтин бэрэсидьиэнэ Михаил Мамиашвилига уонна сүрүн тренер Дзамболат Тедеевкэ Кубогы Саха сиригэр ыытыахха диэн этии киллэрбитэ. Белградка буолбут хамыыһыйа бу этиини өйөөн, ылыммыта.
Арассыыйа бу күрэхтэһиини аан бастакытын 2007 сыллаахха Красноярскайга ыыппыта. 2011 сыллаахха — Дагестаҥҥа.