Ил Дархан Айсен Николаев муус устар 2 күнүгэр өрөспүүбүлүкэ экэниэмикэтэ сайдарын, социальнай өттүнэн туруктаах буолары хааччыйар миэрэлэри ылынар туһунан ыйааҕа тахсыбыта. Биир сүрүн хайысханан нэһилиэнньэ социальнай көмүскэлин бастакы уочарат хааччыйарга туһуламмыт былааны ылыныы буолар.
Кириисиһи утары ылыллыбыт саҥа миэрэлэр Ил Дархан кулун тутар 24 күнүнээҕи 1075 №-дээх ыйааҕынан бигэргэммит көмөнү кэҥэтэн биэрэллэр. Экэниэмикэ эмсэҕэлээбит салааларын эрэ буолбакка, боростуой дьону өйүүр сыаллаахтар.
“Сотору кэминэн Уһук Илин ипотекатын бастакы усунуоһун 20%-тан 5 %-ҥа диэри кыччатар туһунан этиини федеральнай таһымҥа таһаарар былааннаахпыт”, — диэн бырабыыталыстыба бэрэссэдээтэлин солбуйааччы Кирилл Бычков иһитиннэрдэ.
Айсен Николаев V Илиҥҥи экэнэмиичэскэй пуорум мунньаҕар Уһук Илин олохтоохторун олорор усулуобуйаларын тупсарыыга этии киллэрбитэ. Владимир Путин ону өйөөн, 2019 сыл ахсынньытыгар, Уһук Илин ипотекатын үлэлэтэр туһунан ыйаах таһаарбыта.
2%-наах Уһук Илин ипотекатынан 36 саастарын туола илик эдэр ыаллар уонна гектаар ылбыт дьон туһанар бырааптаахтар. Саха сирэ маннык ипотеканы биэрии ахсаанынан Уһук Илин эрэгийиэнигэр инники күөҥҥэ сылдьар. Кулун тутар ыйга диэри 3,3 миллиард солкуобай суумалаах 870 дуогабар түһэрсиллибит.
Ангелина Васильева, “Саха сирэ” хаһыат, edersaas.ru
Хаартыска: СИА