Саха сирэ Илиҥҥи ньиэп форумугар гаас уматыгы оҥорууга аналлаах бырайыагы билиһиннэрдэ

Саха сирэ тимир көлөҕө, тимир суолун уонна уу тырааныспардарыгар  уонна автономнай оттукка туһанарга аналлаах ыгыылаах гааһы оҥорон таһаарыыны лаппа кэҥэтиэҕэ. Ол курдук, ис ырыынакка анаан сылга 100 тыһ. туонна кээмэйдээх ыгыылаах гааһы оҥоруоҕа. Бу туһунан СӨ Бырабыыталыстыбатын бэрэссэдээтэлэ Андрей Тарасенко Владивостокка ыытылла турар Илиҥҥи ньиэп, гаас форумугар иһитиннэрдэ.

Бу иннинэ  Ил Дархан Айсен Николаев  гаас уматыгын оҥоруу олоххо киирдэҕинэ,  саҥа оробуочай миэстэлэри таһаарыаҕа уонна нолуок киириитигэр төһүү күүһүнэн буолуоҕа диэн быһаарбыта. «Бу Арассыыйа таһымнаах бырайыак  сотору Саха сиригэр киириэҕэ. Ол курдук, киинтэн  Охотскай муораҕа диэри чуолаан Айаан бөһүөлэгэр диэри гаас ситимэ тардыллыаҕа уонна ити түмүгэр, сылга 18 мөл туонна кэриҥэ гаас уматыга оҥоһуллуоҕа», – диэн Андрей Тарасенко быһаарар.

СӨ бырамыысыланнаска уонна геологияҕа миниистирэ Максим Терещенко быһаарбытынан, эрэгийиэҥҥэ 2016 сылтан гаас уматыгын оҥоруу саҕаланан билигин сылга 12 тыһ туонна ыгыылаах гаас бэлэмнэниллэр. Ону тэҥэ, «Сахатранснефтегаз»  уонна «ЯТЭК» АУо-лар ыгыылаах гааһы оҥоруунан дьарыктаналлар уонна 2021 сылга холбоон барыта 39 тыһ туонна гаас уматыгын оҥорбуттар. Хампаанньалар оҥорон таһаарар кээмэйдэрин өссө улаатыннарар былааннаахтар. Санатар буоллахха,  аан дойдутааҕы Илиҥҥи ньиэп, гаас форума от ыйын 6-7 күннэригэр Владивосток куоракка ыытыллар.