Саха сирэ Харбиҥҥа Арассыыйа-Кытай ЭКСПО-тыгар улахан экспозициятын билиһиннэрэр диэн суруйаллар СӨ Тас сибээскэ министиэристибэтиттэн.
Санатан эттэххэ, Арассыыйа-Кытай VI ЭКСПО-та бу ый 14 күнүттэн Кытайга Харбин куоракка саҕаламмыта. Норуоттар икки ардыларынааҕы далааһыннаах тэрээһиҥҥэ, өрүү да буоларын курдук, аан дойдуттан муһуннулар. СӨ Ил Дархана Айсен Николаев баһылыктаах биһиги өрөспүүбүлүкэбит дэлэгээссийэтэ өрө көтөҕүллүүлээхтик кыттар.
Быйыл Саха Өрөспүүбүлүкэтэ Арассыыйа өттүттэн бу далааһыннаах тэрээһин — ЭКСПО биир саамай сүрүн региональнай партнерунан буолар. Экспозиция 400 кв.м. иэннээх сиринэн тайыыр. Павильон ортотугар алта миэтэрэ үрдүктээх Аал Луук Мас ыалдьыттары ыраахтан ыҥыра-угуйа турар диэн СӨ Тас сибээскэ уонна норуоттар дьыалаларыгар министиэристибэтиттэн иһитиннэрэллэр. Суруйалларынан, павильон дьон-сэргэ болҕомтотун тардарга анаан тиэмэлэринэн араарыллыбыт. Онно сылдьыбыт дьон Саха сирин туһунан сиһилии билсэр кыахтаммыттар.
- VISIT YAKUTIA
Павильоҥҥа Саха сирин туристическай брендин кытары билсэллэр: «Кыһын Саха сириттэн саҕаланар» бэстибээл, «Покорители холода» бырайыак, Ыһыах туһунан, о.д.а. сөҕө-хайгыы истээччи-көрөөччү үксээбит.
- MADE IN YAKUTIA
Бу салааҕа киһини эрэ умсугутар ураты кэрэ ювелирнай оҥоһуктар, Саха сирин биллэр-көстөр маастардарын сэлии муоһуттан уус-уран оҥоһуктара, Саха сирин маанылаах айылҕатын бородууксуйата, хоту сир үчүгэй да үчүгэй амтаннаах чэйэ, ханна да хатыламмат минньигэс балыга ыалдьыттары сөхтөрөр.
- INVEST YAKUTIA
Инвестиционнай бырайыактар презентациялара болҕомтону тардар. Манна сир аннынааҕы баайы туһаҕа таһаарыыттан саҕалаан тырааныспар, логистика эйгэтигэр, Өлүөнэ эбэни туоруур муостаны тутуу бырайыактара бар дьон болҕомтотун тардыан тардыбыт.
- EDUCATION&INNOVATION
Санатар буоллахха, 2018 сыл бүтүүтүгэр Дьокуускайга Уһук Илиҥҥэ бастакынан ИТ-Парк аһыллыбыта. Бу тас ырыынакка тахсарга, саҕалааччы предпринимателлэргэ, ИТ-компания салгыы сайдыытыгар, далааһыннанарыгар кыаҕы биэрбитэ.
Павильоҥҥа Сколковоҕа «StartUp Village» норуоттар икки ардыларынааҕы инновационнай форумҥа билиһиннэрбит Саха сирин аҕыс IT-стартабыттан биирдэрэ туруоруллубут. Маны сэргэ, Education&Innovation стендэҕэ ХИФУ Арктикатааҕы инновационнай киин кыттыыны ылар.