“Саха сирэ” хаһыат уонна “Эдэр саас” сайт бу нэдиэлэҕэ ханнык интэриэһинэй матырыйаалларынан ааҕааччыларын сэҥээрдэллэрий? Бу туһунан кылгастык ырытыах.
Елена ПОТОЦКАЯ «Саха сирэ» хаһыат, www.edersaas.ru
Хаһыат бүгүҥҥү төрдүс нүөмэрэ 42 738 тирааһынан таҕыста. Кэрэхсэбиллээҕэ, бу күннэргэ “Саха сирэ” хаһыат улуустарга тиийэн, нэһилиэктэринэн кэмигэр тарҕатыллан, суруппут ааҕааччыга чуо тиийэр буолла. Хаһыат сэрэдэтээҕи нүөмэрин ааспыттааҥҥы нүөмэр курдук, “Чыпчаххай“ рубрика аста. Бүгүҥҥү сытыы тиэмэ – Бүлүү куоракка төгүрүк тулаайахтарга уонна төрөппүтэ суох хаалбыт оҕолорго анаан тутуллубут дьиэлэр кыһалҕалара. “Дьаһалта үлэһитэ сайаапка докумуонун оҥорбут дьиэтиттэн кыбартыыраны ылбыта интэриэһинэй”, — диэн этиини тоҕо ойуччу тутан холобурдаабыппын, бу матырыйаалы сиһилии аахтаххытына билиэххит.
Ааҕааччы сөбүлүүр “Итии чэй“ рубрикатыгар Татьяна Маркова “Айанньыт Макаарап” диэн төбөлөөх бизнесмен Егор Макаровтыын кэпсэтиитэ таҕыста. “Олбуор харбаан, муоста сууйан, былакаат суруйан муспут харчыбынан икки джинсы атыылаһан кэллим…” – диэн кэпсиир Егор Макаров. Бу икки джинсыттан саҕаламмыт улахан дьыалатын туһунан саха биир тарбахха баттанар бизнесменэ тугу кэпсээтэ? Бу туһунан ааҕыҥ.
“Сахамедиа” холдинг өрөспүүбүлүкэ 100 сылын көрсө тэрийбит “Киэҥ сир” национальнай бырайыага хаһыакка эмиэ салҕанна. Сахалар кэннэ Саха сиригэр элбэх ахсааннаах омугунан нууччалар буолаллар. Халыҥ хаһыат дьоруойунан ким буолла? Бу туһунан 6-с балаһаҕа ааҕыҥ.
“Чараҥ” литературнай балаһаҕа Утум Захаров “Алампа ытыы олорорун көрбүтүм” диэн 97 cааһыгар үктэммит Анна Жиркова кэпсээнинэн киһи хараҕар киинэ курдук көстөн кэлэр бэртээхэй ыстатыйаны суруйан бэчээттэттэ. Онон бу матырыйаалы хайаан да ааҕыҥ диэн сүбэлиибин.
Хаһыакка бырабыыталыстыба ааспыт сыллааҕы үлэтин нэһилиэнньэҕэ отчуота тэттик хайысхаларга араарыллан, уратытык ырытыллыбыта ааҕааччы болҕомтотун тардыаҕа.
“Арыллыбатах аартыктарынан” рубрикаҕа Василий Никифоров хос куолайдаах дьахтар туһунан суруйан бэчээккэ бэлэмнээн таһаарда.
Оттон бу иһитиннэриибин ордук спорка сыһыаннаах дьон ааҕаргытыгар ыҥырабын. Спортивнай суруналыыс Петр Павлов “Соҕотох боруонса” диэн ыстатыйата Ярыгин турнирыгар саха бөҕөстөрө мөлтөхтүк тустууларын ырытар.
edersaas.ru сайт тугунан интэриэһи тарта?
Тирээн турар тиэмэ буолан, Ангелина Васильева суруйбут “Эдэр ыаллары дьиэлииргэ федеральнай үп көрүлүннэ” диэн матырыйаалын үгүс киһи интэриэһиргээтэ. Ол курдук, бу сытыы тиэмэ 8 472 ааҕааччы интэриэһин тарта. 36 киһи комментарийга кытынна. Ол онтон Байбал диэн бэйэтин билиһиннэрбит киһи: “Биһиги үс оҕолоохпут. Дьиэм көҥдөйүн онорбутум үс сыл буолла. Оннук турар. Өссө да кэҥэтэр былааннаахпыт. Бэйэм дьарыктаах буолуу киинигэр турабын. Кэргэним оҕотун көрөн олорор. Салгыы дьиэбитин оносторбутугар туох эмэ көмө баар буолуон сөп дуо? Бу бачча элбэх ыйытыылаах дьоҥҥо туһаайан, Ангелина Васильева: “Мин исписэлиис буолбатахпын, суруналыыспын. Ыйытыыларгытын барытын мунньан, бу бырагырааманан дьарыктанар департаментан хоруй ылыаҕым. Онтон сиһилии атын матырыйаал оҥоһуллуоҕа”, — диэн хоруйдаабыт. Ааҕааччылар ыйытыыларынан утары сибээс олохтонон, бу дьону интэриэһиргэтэр сытыы боппуруос салгыы ырытыллыаҕа. Онон интэриниэт күүһүн биир көрүҥэ – ааҕааччылыын быһа сибээс түргэнник олохтоноро буолар.
edersaas.ru интэриниэт-сайтка, сүрүннээн, дьон кэпсээннэри киирэн ааҕаллар эбит диэн ааспыт ырытыыбар бэлиэтээбитим. Ол курдук, “Абылаҥ күүһэ — таптал” диэн кэпсээн ааспыт нэдиэлэҕэ 5859 ааҕааччыны түмпүт диэн бэлиэтээбит буоллахпына, бу нэдиэлэҕэ “Куораттааҕы имэҥ” кэпсээн 9 379 ааҕааччыны интэриэһиргэттэ. “Улуустары таай” диэн тест 13 432 киһини түмтэ. Уопсайынан, ааҕааччылары чэпчэки ис хоһоонноох жанр ордук интэриэһиргэтэр эбит. Ол курдук, “Минньигэс түүн”, “Экзотическай таптал” курдук кэпсээннэри дьон хото аахпыт.
“Кытай туриһа Тымныы полюһугар Өймөкөөҥҥө бэлисипиэтинэн туруммут сонуна социальнай ситимнэртэн саҕыллан, дьону аны “Эдэр саас“ сайтка сирдээн аҕалла”, —диэн ааспыт ырытыыга эппитим. Ол курдук, ааспыт нэдиэлэҕэ “Кытай туриһа Нуораҕанаҕа “доширак” сиэн ааста” диэн сонуну 1347 киһи киирэн көрбүт буоллаҕына, “Өймөкөөн тымныыта кытайга бэриммэтэ — турист айанын тохтотто” диэн матырыйаалы 5 670 киһи интэриэһиргээн аахта. Бэлисипиэттээх кытай ханна тиийэн тугу гынарын, кимниин алтыспытын билэн баран, батсаап уонна фейсбук нөҥүө үгүс ааҕааччы санаа этиннэ. Бу сыыппара өссө да улаата турар чинчилээх.
… Ити курдук, күн аайы хас чаас аайы араас интэриэһинэй сонуннарынан, матырыйаалларынан уонна кэпсээннэринэн байытылла турар “Эдэр саас“ сайт матырыйаалларын хайаан да киирэн ааҕаргытыгар сүбэлиибин.
“Саха сирэ” хаһыаты уонна интэриниэт таһаарыылары ырыттахха, итинник.
Елена ПОТОЦКАЯ «Саха сирэ» хаһыат, www.edersaas.ru