«Саха сирэ» хаһыат Улуу Кыайыы 75 сылыгар анаабыт нүөмэрэ таҕыста (Видео)
«Саха сирэ» бу чэппиэрдээҕи нүөмэрэ Кыайыы 75 сылыгар ананна. Бырааһынньыктааҕы хаһыат Аҕа дойду сэриитин кыттыылаахтарын оҕолорун, сиэннэрин ахтыыларыттан таҥыллан оҥоһулунна.
edersaas.ru
ССРС норуодунай учуутала, РСФСР үтүөлээх учуутала Михаил Алексеев туһунан хаһыат үгүстүк сырдатар. Биһиги ааҕааччыларбытын кини төрөппүт уолун, СӨ үтүөлээх, өрөспүүбүлүкэтээҕи лиссиэй физикаҕа учууталын Михаил Алексеевы кытта кэпсэтии сэҥээрдиэҕэ.
***
Сунтаар улууһун Түбэй Дьаархан нэһилиэгэр «Правда» холкуоска бэрэссэдээтэллии сылдьан, 1943 сыл от ыйыгар аармыйаҕа ыҥырыллан барбыт Аҕа дойду сэриитин кыттыылааҕа Матвей Егоров 1975 сыллаахха суруйбут ахтыытын кини сиэн балта Анетта Егорова бэчээккэ бэлэмнээтэ.
***
Уус Алдан улууһун Д.Д.Оллонов аатынан Түүлээх орто оскуолатын 8-с кылааһын үөрэнээччитэ Лидия Винокурова эһээтин Винокуров Константин Алексеевич туһунан «тугу билбиппин, истибиппин, үөрэппиппин эһиэхэ тиэрдиэхпин баҕарабын» диэн билиһиннэрдэ.
***
Бэчээт бэтэрээнэ Рена Шестакова буойун суруналыыстары кытта кырдьаҕас “Кыым” хаһыат эрэдээксийэтигэр бииргэ үлэлээбит сылларын олус истиҥник ахтыбыта интэриэһи тардара чахчы.
***
Үөһээ Бүлүү улууһун уонна Маҥаас нэһилиэгин бочуоттаах олохтооҕо, сэрии бэтэрээнэ Бүөтүр Акыымабыс Акыымап туһунан Валентина Догоюсова бэчээккэ бэлэмнээн ыыппыта таҕыста.
***
Хаҥалас Нөмүгүтүгэр биэс бырааттыы Реевтэр сэрии уот кутаатын ортотунан ааспыттара. Кинилэр бары бааһыран, инбэлиит буолан, төрөөбүт буордарыгар тыыннаах эргиллибиттэрэ. Уолаттар бары ийэлэрин алгыһын сүрэхтэригэр иҥэринэ сылдьыбыттарын ахталлар. Кинилэри уоттаах сэриигэ, төһө да буулдьа ситтэр, өлөр өлүү кыайбатах. Ол курдук, күн-күбэй ийэлэрин алгыһа көмүс чыычаахтарын араҥаччылаабытын туһунан балтылара Ольга Реева суруйда.
***
Түөрт төгүл бааһыран, контузияланан, түөрт төгүл бойобуой уордьанынан, мэтээллэринэн наҕараадаланан, Кыайыы параадыгар кыттан, 1945 сыл атырдьах ыйын 30 күнүгэр сэриигэ кыттыытын түмүктээбит Захар Саморцев туһунан Панкратий Петров ахтыыта эмиэ Улуу Кыайыы 75 сылыгар анаммыт хаһыакка таҕыста.
***
Мэҥэ Хаҥалас Бүтэйдээҕин ыччата, хорсуннук сэриилэспит Матвей Стручков сэриигэ сылдьыбытын уонна госпиталга сытан тахсыбытын туһунан докумуонун тоҕо былдьаппытай? Ыраах Тымныы полюһун — Өймөкөөнү хайдах иккис дойду оҥостубутай? Уустук дьылҕалаах эһээтин туһунан сиэнэ Анна Стручкова суруйбутун ааҕыҥ.
***
Итини тэҥэ, бырааһынньыктааҕы хаһыакка сэрии туһунан сахалыы киинэлэр, ырыалар тустарынан матырыйааллар бэчээттэннилэр. Бырааһынньыктааҕы хаһыат ааҕааччы болҕомтотун тардарыгар эрэнэбит.
Елена ПОТОЦКАЯ, «Cаха сирэ» хаһыат, edersaas.ru