Бүгүн Мэҥэ Хаҥалас улууһун Майа сэлиэнньэтин олохтооҕо Зиновий Игнатьев «Саха сирэ» хаһыатын ходуһатыгар илдьэ сылдьан ааҕа олорор хаартыскатын ыыппытын туттубут.
edersaas.ru
Эрэллээх ааҕааччыбыт Зиновий Игнатьев батсаабынан бэйэтин санаатын маннык суруйан ыытта:
— «Саха сирэ» хаһыаты иккис сылбын сурутан ааҕабын. Олох сыттана сылдьан ааҕар хаһыаппынан буолла — ис хоһооно наһаа үчүгэй! Чэппиэргэ тахсар хаһыат киэһэ почтам дьааһыгар номнуо баар буолар. Онон чэппиэр күнү, били сэбиэскэй кэмҥэ хаһыаты күүтэрим саҕа, кэтэһэбин аҕай. «Саха сирэ» хаһыаты барыларыттан ордоробун, наһаа сэргээн, үстэ төхтөрүйэн ааҕабын. Бастаан почта дьааһыгыттан хостоон, билсэбин. Онтон өйүөбүн кытта уктан кэбиһэбин. Сарсыныгар ходуһаҕа омурҕаҥҥа олорон, сиһилии көрөбүн-истэбин. Киэһэ утуйуу саҕана «чэ, бэйэ маны киэһэ көрүөм» диэн «хаһааммыппын» сиһилии ааҕабын. Мин тохтуур кэммэр кэргэним Клара «Тиэргэни», «Сүбэ холбукатын» уонна «Саха ыалын» ааҕар. Наһаа «бириинчик» ааҕааччыбын. Уһуннук тэһийэн хаһыаты аахпаппын эрээри, дьэ, «Саха сирэ» хаһыаты саҕаланыаҕыттан бүтүөр диэри олорон ааҕабын. Сөбүлүүрүм диэн, бу хаһыат суруксуттара билиҥҥи олох сиэринэн араас псевдонимынан сабыммакка, күөртээһини таһаарбакка, тыа сирин олоҕун-дьаһаҕын хайдах барынан суруйаллар. Кэрэхсэбиллээҕэ, бары тиэмэ толору сырдатылларын ааҕарбын ааһан, түбүктээх үлэҕэ иллэҥсийэ түһэн, өрүү сканворд таайабын. Биир-икки тылы син биир билбэккэ гынан баран, кэлэр нүөмэргэ таайыллыытын билээри кэтэһии — биир үтүө түгэн. Хаһыаппын ылаат, тута ол «эрэйдээбит» тылларбын була охсобун. «Һуу, хайаан таайбатахпыный!» — диэн өрүү кэмсинэбин. Дьэ ити курдук кэтэһиилээх хаһыат — «Саха сирэ»!
Елена ПОТОЦКАЯ, «Саха сирэ» хаһыат, edersaas.ru