“Саха сирэ” хаһыат ыам ыйын 5 күнүнээҕи саҥа нүөмэрэ таҕыста. Бу нүөмэргэ Иван Ксенофонтов редактордаах “Манчаары” сыһыарыы түөрт балаһанан бэчээттэннэ.
Араадьыйа күнүн көрсө, суруналыыс Елена Потоцкая, ураты буочардаах араадьыйа, телевидение, хаһыат суруналыыһа Василий Посельскай туһунан ыстатыйата таҕыста.
Иллэрээ сылтан Арассыыйаҕа “Земскэй учуутал” бырагыраама үлэлиир. Тыа сиригэр үлэлии барар учууталларга федеральнай хааһынаттан 2 мөл. солк. көрүллэр.
СӨ Үөрэҕин министиэристибэтин чахчыларынан, Саха сиригэр 2022-2023 үөрэх дьылыгар барыта 936 вакансия аһыллыбыт. Манна учууталлар эрэ буолбакка, оскуола, уһуйаан, эбии үөрэхтээһин тэрилтэлэригэр баар миэстэ барыта киирэ сылдьар. Күн бүгүн нуучча тылын уонна литэрэтиирэтин, математика, омук тылын, физика, биология учууталлара тиийбэттэр. “Земскэй учуутал” бырагыраама туһунан суруналыыс Людмила Попова суруйуута таҕыста.
Билигин Өлүөнэ эбэ кытылыгар 145 нэһилиэнньэлээх пуун баар. Былырыыҥҥы халаан уута улахан алдьатыыта суох ааспыта. Өрүстэргэ муус 1 — 14 күнүнэн эрдэ устубута. Арай Өлүөнэҕэ уонна Аммаҕа биир-түөрт күнүнэн өрүс хойутаан эстибитэ.
Быйыл быһыы-майгы хайдах буолуой? Ол туһунан “Ленарегионводхоз” филиалын дириэктэрэ Александр Аржаков уонна инженер-гидротехник Петр Васильев суруйууларыгар ааҕыҥ.
Аҕа дойдуну көмүскүүр сэрии кыттыылааҕа Прокопий Афанасьевич Степанов быйыл от ыйын 1 күнүгэр лоп курдук 100 сааһын туолар. Борокуоппай Сунтаар улууһун 1-кы Бордоҥ нэһилиэгэр элбэх оҕолоох дьиэ кэргэҥҥэ төрөөбүтэ. Бу ыалтан үс уол буолан Ийэ дойду көмүскэлигэр туруммуттара.
Кыайыы күнүн Прокопий Афанасьевич Берлиҥҥэ көрсүбүтэ.
Дойдутугар 1947 сыллаахха эргиллэн кэлбитэ. Сержант Прокопий Степанов Аҕа дойдуну көмүскүүр Улуу сэрии саҕаланыаҕыттан, уһуннук, хорсуннук сэриилэһэн, Европаны бүтүннүү ааһан, Чехословакияны, Польшаны, Германияны, Австрияны фашизмтан босхолоон, бойобуой суолун Венаҕа тиийэн түмүктээбитэ. Суруналыыс Ангелина Васильева “100 сааһын туолар сэрии бэтэрээнэ” диэн ыстатыйата үгүс ааҕааччы сэҥээриитин ылыаҕа.
Бу күннэргэ сэрии сылларыгар тахсыбыт “Кыым” хаһыат нүөмэрдэрин суруналыыс Егор Карпов көрдө-иһиттэ. “Былыргы хаһыаттары ааҕыы бэрт элбэх санааны үөскэтэр. Суруйуу истиилэ, сахалыы сурук оччотооҕу кэмҥэ туруга, уонна сүрүнэ – оччотооҕу дьон олоҕо-дьаһаҕа, настарыанньата ырылхайдык бэриллэр. Сэрии саҕаламмыт 1941 сылыттан биэс сыл тухары хайдах курдук үлэлээн, толкуйдаан, сэрии көлүөнэтэ Кыайыыны уһансыбытын ааҕар долгутуулаах дьарык”, — диэн Егор этэр. Онон бу хаһыаппытыгар 1941, 42, 43, 44, 45 сыллардааҕы суруйуулары бэчээттээтибит.
Киин улуустарга былырыыҥҥыга тэҥнээтэххэ, бу ыйга балай да хойутаан сылыйыыһы. Ыам ыйа үгүс улуустарга I дэкээдэҕэ түүҥҥү өттүгэр үгүс улуустарга сылаас турар. II дэкээдэҕэ күүскэ ириэрэн, уу күүскэ киириэҕэ. Ардах иккис уонна бүтэһик дэкээдэҕэ кэлэрэ сабаҕаланар уонна мууһу кэбирэтэн, өрүстэр этэҥҥэ барыахтара диэн Тускул ыам ыйдааҕы билгэтин ааҕыҥ.
Бу уонна да атын интэриэһинэй суруйуулары, ол иһигэр суруналыыс Женни Стрюкова Үлэ Дьоруойа Владимир Африканович Михайловтыын кэпсэтиитин, оскуола оҕолоругар, чуолаан оскуоланы бүтэрээри сылдьар үөрэнээччилэргэ сүбэлэри, сэрии, тыыл бэтэрээннэригэр туох көмө оҥоһулларын туһунан матырыйааллары “Саха сирэ” хаһыат бүгүҥҥү нүөмэригэр ааҕыҥ.
edersaas.ru