«Саха сирэ» хаһыат бу нэдиэлэҕэ тугу суруйда?

Ааптар: 
Бөлөххө киир:

“Саха сирэ” хаһыат бу нэдиэлэҕэ туох интэриэһинэйи суруйан ааҕааччы болҕомтотун тардыай?

Елена ПОТОЦКАЯ, «Саха сирэ» хаһыат, edersaas.ru

Сириэдийии эбэтэр симэлийии” диэн ыстатыйатыгар Василий Никифоров саха сүөһүтүн иитии туһунан, бэйэтэ бэлиэтээбитинии, “ырытан-ырыҥалаан” көрөргө сананна. Суруналыыс бу матырыйаалын ааҕа олорон киһиэхэ, кырдьык да, бэрт ыраахтан аҕалан ииттэр сүөһүлэрбитинээҕэр САХА ЫНАҔАР тоҕо болҕомто уурбаппытый диэн санаа үөскүүр. Ол эрээри “инникитин бу хайысхаҕа харса суох үлэлииргэ “күөх уот” умайда”, — диэн Тыа хаһаайыстыбатын министиэристибэтин эппиэттээх үлэһитин этиитин ааҕан баран, эрэл кыыма үөскээтэ.

Бу ырытыы ыстатыйаны хайаан да булан ааҕаргытыгар сүбэлиибин.

 Отделение үрүҥ халааттаах аанньаллара ыарыһахтара өллөҕүнэ, тэҥҥэ ытаһар, хараастар түгэннэрэ аҕыйаҕа суох. Ордук эдэркээн дьон эрэйи көрбүт сирэйдэрин көрдөхтөрүнэ, харахтарын уутун туттуммат эмчиттэр эмиэ баар буолаллар. Кырдьыга да икки эдэркээн уол аппаракка сытан: «Таҥара биһигини туох иһин накаастаата? Ыал да буолбатыбыт, оҕо-уруу да төрөппөтүбүт…» диэн муҥатыйар саҥаларын истэр эмчиккэ да төһөлөөх ыарахан буолуой?” — диэн бэлиэтээн туран, эмчиттэр уустук үлэлэрин сырдатар Надежда Егорова 25 сыл анараа өттүгэр аһыллыбыт Медицина национальнай киинин хроническай гемодиализка уонна нефрологияҕа отделениетын эмчиттэрин туһунуан суруйуутун ааҕыҥ. Бу үөһэ аҕалбыт холобурдарым курдук араас холобурдаах матырыйаалы киһи анаан тартаран ааҕар. “Мин маны барытын тоҕо кэпсээтим?” – диэн суруналыыс ыйытан баран, туох хоруйу биэрдэ? Дьэ, ааҕыҥ уонна сэргээҥ.

“Төлкөттөн” төлкөлөөх артыыс” диэн “Итии чэй” рубрикаҕа соторутааҕыта 75 сааһын туолбут артыыс Зоя Багынанованы кытта Татьяна Маркова кэпсэттэ. Интервью саҕаланыытыгар Зоя Петровна хайдах кус оҕото буола сыыһан, күн бүгүҥҥэ диэри өттүгүн уҥуоҕар үс доруобунньук хатана сылдьарын ааҕан баран, үгүс киһи соһуйуоҕа. Артыыс маннык ахтар:

Бэртээхэй далаһа оҥорбуттара, онно олорон, атахпын суунабын, онтон баттахпын өрүнэ олордохпуна, Сылластыгаһым бу бэрийэн кэлэр…   Онтон арай, туох эрэ сүпсүлгэнэ буолла — күөл нөҥүө өттүгэр эр дьон кус оҕолорун көрө түспүттэр. “Каадырга киллэриэх, наһаа бэрт!” – дьонум омуннуруу бөҕөтө. Аны миигин, “Ыл, Зоя, эдэр киһи, бараҥҥын кус оҕолорун үүр эрэ…» — дэстилэр. Мин буоллар, чап-чараас сиидэс былааччыйалаахпын, атах сыгынньахпын, хап-сабар сүүрэн элэстэнэ турдум. Арай, тэйэр да бокуой биэрбэккэ, дьонум ытыалаан киирэн барбаттар дуо?! Тулам туохта биир кэм “тыбыр”- “тыбыр” гынар… Көхсүбүн тоһуйабын. Кэлин өйдөөбүтүм, доруобунньуктара, ууттан тэйэн, миэхэ түһэллэр эбит!”. Салгыы туох буолбутун ааттаах-суоллаах артыыс суруналыыс Татьяна Маркованы кытта кэпсэтиитигэр ааҕыҥ.

Ангелина Васильева “Көдьүүһэ уонча сылынан көстүө” диэн матырыйаалыттан мин  “Туочукалары” уодьуганныахха” диэн түһүмэҕин холобурдуурга сананным. “Аҥардас арыгыны утары охсуһуу баран, кэнники кэмҥэ маассабайдык иһии аҕыйаата. Уопсастыбаннай сирдэргэ, бырааһынньыктарга итирбит-кутурбут киһи көстүбэтин кэриэтэ буолла”, — диэн киһи санаатын көтөҕөр. Салгыы ааптар кыракый маҕаһыыннар, ону тэҥэ Интэриниэт “туочукалара” туох да лицензията суох, түүннэри-күнүстэри атыылыылларын хонтуруоллааһын боломуочуйатын полицияҕа биэрбиттэрин туһунан сырдатта. Үҥсүү киирдэҕинэ, полиция кэлэн, баар арыгыларын былдьыыр, ыстарааптыыр” – диэн суруйар. Арыгы туочукаларын кытта охсуһар дьон ыстараап сууматын билэллэригэр бэртээхэй иһитиннэрии тахсыбыт. Ол курдук ыстараап сороҕун холобурдаатахха маннык:

Лицензията суох атыылааһын иһин, предпринимателгэ — 10 000-15 000 солк.

Түүн атыылаабытын иһин, атыыһыкка – 1500-4000 солк.

Дуоһунастаах дьоҥҥо — 20 000-40 000 солк.

Юридическэй сирэйдэргэ — 200 000-400 000 солк.

Онон арыгыны утары үлэлиир дьон, суруналыыс бу ырытыы матырыйаалын ааҕыҥ, үлэҕитигэр туһаныҥ.

Түөрт уол оҕо ийэтэ өр кэмҥэ үлэтэ суох олорон туоххаһыйара ханна барыай?Ол оннук чуҥкуйар кэммэр ютубка араас лиэксийэлэри истэр буолбутум. Истэр тиэмэм – бэйэ кыаҕын хайдах туһаныахха, көҥүллүк сылдьан араас өҥөнү оҥорон, хамнастаныахха диэн. Сотору кэминэн миэхэ идиэйэ үөскээн таҕыста – саҥа төрөөбүт оҕоҕо аналлаах альбом оҥорор эбиппин диэн, — диэн кэпсиир эдэр ийэ Вероника Александрова. Кини холобура, үлэтэ суох олорор дьоҥҥо, оҕолоругар олорор эдэр дьахталларга олоххо бэйэни буларга бэртээхэй сүбэнэн буолуоҕа.

Ити курдук “Саха сирэ” хаһыат бу нэдиэлэтээҕи сорох суруйууларын кылгастык билиһиннэрдэххэ итинник.

Елена ПОТОЦКАЯ, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0