«Саха сирэ» хаһыат бүгүн туох интэриэһинэйи суруйда?

Ааптар: 
Бөлөххө киир:

Хаһыат чэппиэрдээҕи нүөмэрэ бүгүҥҥү сонунун иһиттэҕинэ, үгүс киһи киоскаларга атыылаһа тиэтэйэрэ чахчы.

Бу нэдиэлэҕэ РФ Бырабыыталыстыбатын бэрэссэдээтэлэ Михаил Мишустин Саха сиригэр кэлэн барыыта биир улахан сабыытыйанан буолла. Бу сырыы туһунан суруналыыс Александр Тарасов саас-сааһынан кэпсээбитин ааҕа олорон киһи, кэккэ мунньахтарга, көрсүһүүлэргэ Мишустины кытта тэҥҥэ сылдьар курдук сананар. РФ Бырабыыталыстыбатын бэрэссэдээтэлэ Саха сиригэр тастан киириини солбуйуон сөптөөх өрүттэргэ болҕомтотун хатаата уонна ону хайдах туһанар туһунан тугу бэлиэтээбитин сиһилии Александр Тарасов матырыйаалыгар ааҕыҥ. Бу суруналыыс хаһыат нүөмэрин аайы сэбиэскэй кэминээҕи курдук улуустарынан сиһилии оттооһун хаамыытын ырытар. Бүгүҥҥү хаһыаттан эмиэ төһө от кэбиһиллибитин, Үөһээ Бүлүүгэ уу мэһэйдээбитин, Аммалар мобильнай биригээдэлэри хото үлэлэтэллэрин туһунан билиэххит.

Бу күннэргэ Арассыыйа бырабыыталыстыбатын премьер-миниистирэ Михаил Мишустин Саха сирин сайдыылаах IT эрэгийиэннэриттэн биирдэстэрэ эбит диэн анаан астынан барда. Кэрэхсэбиллээҕэ баар, аныгы технология киин куоракка эрэ буолбакка, улуустарга эмиэ сайдаллар. Бүгүҥҥү хаһыакка биир бөдөҥ улууска быйыл кулун тутарга аһыллыбыт IT-паарка туһунан бэрт интэриэһинэй матырыйаалы хайаан да ааҕаргытыгар сүбэлиибит. Өҥнөөх хаартыскалары көрө олорон аахтаххытына, хайаан да улууска тиийэн, маны барытын илэ көрөн кэлэр санаа үөскүөҕэ.

«Ыраас Арктика» диэн федеральнай бырайыакка 2022 сылга Арктика үс оройуона киирдэ, бу улуустарга бырамыысаланнас үлэтин кэнниттэн хаалар хаарбах тимири ыраастааһын ыытыллар. Ханнык улуустар бу олус наадалаах бырагыраамаҕа киирбиттэрин туһунан бүгүҥҥү хаһыаттан билсиҥ. Бэрт аҕыйах сыллааҕыта саха скиһитигэр «сулугур ууну атыылаһан иһиэҥ» диэтэхтэринэ, итэҕэйиэ суоҕа эбитэ буолуо. «Ама, өрүс уута баранан, оннук муҥнаннахпытый?» диэн күлэн кэбиһэрэ чахчы. Оттон бүгүн атыыланар 19 лиитэрэлээх ыраастаммыт бытыылкалаах уу күннээҕи олохпут аргыһынан буолла. «Скважина» уутун хото иһэр улуус туһунан бүгүҥҥү матырыйаал үгүс киһини интэриэһиргэтиэҕэ. Соторутааҕыта улуус балыыһатын кылаабынай бырааһа Ираида Харлампьева ыҥырыытынан Өймөкөөн улууһугар онколог-быраастар дэсээннэрэ үлэлээтэ. Бу улууска искэн ыарыытын балаһыанньата хайдаҕын, онколог-быраастар туох түмүгү оҥорбуттарын туһунан бүгүҥҥү чэппиэрдээҕи хаһыаттан билиэххит. Анаабыр улууһа Арктикаҕа саамай сылдьарга эрэйдээх улууһунан буолара. Ол эрээри кэлиҥҥи сылларга, бэл, силиэсэрдэр «маннык усулуобуйа ханна да суох» диир буоллулар. Бу туһунан «Дьоҥҥо уонна айылҕаҕа кыһамньы» матырыйаалга ааҕыҥ.

Бүгүҥҥү хаһыакка биир нарын, кэрэ бэйэлэх Саха тыйаатырын биллэр артыыһын айар үлэтин, тус олоҕун туһунан суруналыыс Айтана Аммосова икки балаһаҕа суруйан кэпсээтэ. «Тыйаатыр туһунан өйбөр даҕаны суоҕа» диэн төбөлөөх ыстатыйаны аахтаххытына, бэрт элбэҕи билэн соһуйуоххут, бэркиһиэххит.

Хаһыат «Саха ыала» сыһыарыылаах таҕыста. Биллэн турар, манна үгүс интэриэһинэй матырыйаал хото таҕыста. Ангелина Васильева «Элбэх оҕолоох ыаллар дьиэлэнэллэригэр» матырыйаала социальнай көмө быраабылаларыгар туох уларыйыылар киирбиттэрин билиһиннэрэр. «Харысхал» Аһымал пуонда инбэлиит уонна доруобуйаларынан хааччахтаах оҕолорго эрэллээх тирэҕинэн буолар. Бу олус наадалаах тэрилтэ бүгүҥҥү үлэтин-хамнаһын туһунан аатаххытына, биһиги аттыбытыгар сылдьар дьоҥҥо олус да улахан болҕомто ууруллар эбит диэн санааҕа кэлиэххит.

«Оҥоһуу эт» — кэлэр кэскилбит дуо?»  диэн суруналыыс Егор Карпов бэрт интэриһинэй сытыы боппуроһу ырытан суруда. Хайаан да бу матырыйаалы ааҕаргытыгар сүбэлиибин. Эмчит хайдах айар үлэҕэ ылларбытын туһунан суруналыыс Надежда Егорова суруйда. Буор Булгунньах диэн псевдонимнаах мэдисиинскэй наука дуоктара хайдах суруйар ыллыкка киирбитин туһунан ааҕарга интэриэһинэй. Бу  суруналыыс «Диализ, уорганы көһөрүү тулууру, дьулууру эрэйэр» диэн матырыйаала эмиэ үгүс ааҕааччы болҕомтотун тардар. Туризм сонун сүүрээннэрин, ханнык улуустарга туристическай-рекреационнай кластердар тэриллэн эрэллэрин туһунан бүгүҥҥү хаһыакка ханнык салайааччы сиһилии кэпсээбитин эмиэ бүгүҥҥү чэппиэрдээҕи хаһыат ирэ-хоро сырдатта.

Елена ПОТОЦКАЯ,

«Саха сирэ» хаһыат.

+1
0
+1
0
+1
0
+1
0
+1
0
+1
0
+1
0