Коронавирус дьаҥа турбутунан сибээстээн, «Саха сирэ» хаһыат суруналыыстара бу күннэргэ, атын тэрилтэ үлэһиттэрин курдук, дьиэбитигэр олорон үлэлиибит.
ederdsaas.ru
Бүгүн муус устар 16 күнүгэр, 15 №-дээх чэппиэрдээҕи хаһыат туох ис хоһоонноох матырыйааллардаах тахсыбытын кылгастык билиһиннэрдэххэ маннык.
Удьуорунан бэриллэр ыарыыны туох да кыайбат дииллэр. Ол эрээри, маннык толкуйу СӨ үтүөлээх бырааһа, мэдиссиинэ дуоктара Надежда Максимова төрдүттэн утарар, «кыайыахха сөп» диир. Япония, Франция учуонайдарын кытта бииргэ үлэһэр саха эмчитин туһунан Ньургуйаана Иванова суруйда.
***
Физкультура учуутала Афанасий Семенов сибэкки олордорго сүбэтин-аматын, ону сэргэ, сыыппаранан, астрологиянан, Илиҥҥи халандаарынан, фэн-шуйунан үлэлиир Мариана Тимофеева планеталар күүстээх үлэлэриттэн бу ыйдарга туох күүтэрин туһунан кэпсиирин Сардаана Баснаева суруйуутугар ааҕыаххыт.
***
«Хаһыат уонна ааҕааччы» балаһаҕа сылгыһыт уонна талааннаах айар куттаах Никифор Попов туһунан уопсастыбаннай кэрэспэдьиэн Елена Прокопьева, «Өймөкөөн» кэммиэрчэскэйэ суох уопсастыбаннай тэрилтэ көхтөөх кыттааччыта Тамара Винокурова Дьокуускай куоракка босхо эминэн хааччыллыы кыһалҕатын туһунан суруйуулара үгүс ааҕааччы болҕомтотун тардыаҕа. Хаһыат бу матырыйаалларын бэчээккэ бэлэмнээтэ суруналыыс Женни Стрюкова.
***
Простатикка баалатан, ыарыы олоҕурбутун эрэ кэнниттэн бырааска кэлэллэр. Онон бэйэ доруобуйатыгар аахайымтыата суох сыһыаннаһыы туох содуллааҕын туһунан суруналыыс Надежда Егорова суруйуутугар ааҕыҥ.
***
Людмила Попова кулун тутар саҥатыгар Өлүөхүмэ улууһугар командировкаҕа сырыытыттан бу нүөмэргэ хас да матырыйаалы бэлэмнээн таһаарда. Олохтоохтор үйэ аҥарын устата кэтэспит ханнык эбийиэктэригэр суруналыыс болҕомтотун уурда? Ааҕыҥ уонна сэргээҥ.
***
Табаны элбэтэр, төрүөҕү мүччү туппат инниттэн, ардай аһыылаахтартан көмүскэнэр дьаһаллары мөлтөппөккө, ханан кэлэллэрин-баралларын кэтии сылдьаллара, наадалаах кэмигэр суһал дьаһаллары ылаллара ирдэнэр. Табаһыттар үлэлэрин туһунан суруналыыс Раиса Сибирякова бүгүҥҥү ыстатыйатыгар бэлиэтээтэ.
***
Сыстыганнаах ыарыынан сибээстээн, Москваҕа үөрэнэр быйылгы щепкинецтэр дойдуларыгар кэлэн, дистанционнай ньыманан үөрэнэ олороллорун, кинилэр үгэс буолбут уруоктары таһынан, өссө сахалыы тойукка үөрэнэллэрин, ону таһынан Саха сиригэр коронавирус тарҕаныытынан сибээстээн, СӨ норуоттар икки ардыларынааҕы киинэ VI бэстибээлин кыайыылаахтарын онлайн-эрэсииминэн быһаарбыттарын туһунан суруналыыс Татьяна Маркова суруйда.
***
«Тугу көрөбүт, тугу гынабыт? Эрэсиими тоҕо тутуһуохтаахпытый? Интровертар, экстравертар хайдах тулуйалларый?». «Сүбэһит» балаһаҕа дьиэҕэ олорон хайдах аралдьыйар туһунан, Олоҥхо аан дойдуга тахсан Юнеско шедевра буоларыгар дьоһун кылаатын киллэрбит саха учуонай дьахталларыттан биирдэстэрэ Агафья Захарова олоҕуттан икки бэлиэ түгэни уонна харантыын кэмигэр оҕолох ыалларга көмө, Кыайыы 75 сылынан бэтэрээннэргэ көмө туһунан суруналыыс Ангелина Васильева суруйуутун сэҥээриҥ.
***
«Сахаэнерго» харантыын кэмигэр хайдах үлэлии олороруй? Уот, ОДЬКХ төлөбүрүн дьиэҕэ олорон хайдах төлүүбүт? Кредитнэй каникулга ким хапсарый? Коронавирустан эмсэҕэлээбит дьоҥҥо бырыһыана суох кирэдьиит хайдах бэриллэрий? Дьон бары интэриэһиргиир боппуруостарыгар хоруйдары тиһэн суруйда суруналыыс Марианна Тыртыкова.
***
Уус Алдан Бээрийэтигэр Үрэх баһыгар сылгыһытынан үлэлиир Константин Васильевы уонна Нам улууһун Хатырыгын тимир ууһа Алексей Пинигини кытта кэпсэтиилэрбин аахтаххытына, тыа сирин эр дьонун бүгүҥҥү мэтириэтин арыйыаххыт.
Елена ПОТОЦКАЯ, «Саха сирэ» хаһыат, edersaas.ru