Бу күннэргэ Москваҕа ыытылла турар тулалыыр эйгэни харыстааһын V-с сийиэһин чэрчитинэн, «Зеленая Россия – 2017» күрэс кыайыылаахтарыгар наҕараадалары туттардылар.
edersaas.ru
Экологическай күрэс түмүгүнэн, Саха Өрөспүүбүлүкэтэ «Золотой резерв» састаабыгар киирэн, СӨ айылҕа харыстабылын миниистирэ Сахамин Афанасьевка экологическай Оскары туттардылар.
«Зеленая Россия» хамсааһын бэрэссэдээтэлэ Константин Курченков айылҕаҕа харыстабыллаахтык сыһыаннаһыыга Саха сириттэн холобур ылыахтаахпыт диэн этэн туран: «Биһиги дойдубут экологическай өттүнэн саамай ыраас эрэгийиэнинэн Саха сирэ буолар. Бу саас мин Саха Өрөспүүбүлүкэтигэр бара сылдьан, тулалыыр эйгэни харыстааһыҥҥа үлэлии сылдьар энтузиаст дьону кытары көрсүбүтүм», – диэн эбэн эттэ.
Харда тылыгар Сахамин Миланович «Зеленая Россия» диэн тэрээһин чэрчитинэн, өрөспүүбүлүкэҕэ 5 тыһыынчаттан тахса субботник ыытыллыбытыгар 173 тыһыынча киһи кыттыбытын кэпсээтэ.
Анивера АКИМОВА, edersaas.ru