Саха сирэ дойду тыатын хаһаайыстыбатын миниистирин көрсөргө бэлэмнэнэр
Дьокуускайга бэс ыйын 25-27 күннэригэр “Судаарыстыба дьоҕус киэптээх хаһаайыстыбалары өйөөһүнэ уонна тыа сирин туруктаахтык сайыннарыы” диэн тиэмэҕэ Бүтүн Россиятааҕы семинар-сүбэ мунньах ыытыллара күүтүллэр. Бу дойду таһымнаах улахан дьаһалга РФ тыатын хаһаайыстыбатын миниистирэ Александр Ткачев уонна СӨ Ил Дархана Егор Борисов кыттыахтара.
Тэрийээччилэр ыалдьыттары үс бөлөҕүнэн арааран сырытыннарарга былаанныыллар. Бастакы бөлөххө РФ субъектарын АПК-ын салайааччылара (эбэтэр солбуйааччылара) киирэллэр. Иккискэ – дойду муниципальнай оройуоннарын баһылыктара, үһүскэ – дойду муниципальнай оройуоннарын сэлиэнньэлэрин баһылыктара. Кинилэр бары ыам ыйын 25 күнүн сарсыардатыгар көтөн кэлэн бараннар, Үс Хатыҥҥа Туймаада ыһыаҕар ыалдьыттыахтара уонна Дьокуускай бэлиэ миэстэлэринэн сылдьыахтара.
Иккис күн бүтүннүү экскурсияҕа ананыа. Үс бөлөх дьоно хардары-таары урут-хойут Дьокуускай Киллэмигэр 400 миэстэлээх сүөһү комплексын, онтон Нам улууһун I Хомустааҕар “Молодежнай” түөлбэни, Никольскайга “Эрэл” ТХПК толору механизациялаах буойунатын, Аппааныга саҥа тутулла турар “Озернай” түөлбэни көрүөхтэрэ, Нам сэлиэнньэтигэр “Эрэл” ТХПК эбийиэктэригэр, спорт комплексыгар, поликлиникаҕа, оҕо саадыгар сылдьыахтара. Эҥсиэли хочотугар сырыыны бастакы бөлөх Намнааҕы педколледж мунньахтыыр саалатыгар практическай семинарынан түмүктүө. Ити кэмҥэ иккистэр Аппааны оскуолатыгар, үһүстэр Тулагы оскуолатыгар практическай семинардарга кыттыахтара.
Үһүс күн сарсыардата “Хаҥалас” индустриальнай пааркаттан саҕаланан баран, Сыырдаахха дьоппуон технологиятынан тутуллубут “Саюри” тэпилииссэтин комплексыгар салҕаныа. Онтон Дьокуускайга “СахаАгроПродукт” кэпэрэтиип үлэтин-хамнаһын билсиһии кэнниттэн ыалдьыттар бары уонна улуустартан ыҥырыылаах бэйэбит дьоммут Опера уонна балет тыйаатырыгар сүрүн дьаһалга – Бүтүн Россиятааҕы семинар-сүбэ мунньахха түмсүөхтэрэ.
Маҥнайгы былаан быһыытынан, семинар-сүбэ мунньахха Уһук Илиҥҥи уонна Сибиирдээҕи федеральнай уокуруктарга киирэр регионнар кыттыахтаахтар этэ. Оттон тыа хаһаайыстыбатын уонна ас-үөл бэлиитикэтин миниистирин солбуйааччы, тыа сирин сайыннарыы департаменын салайааччыта Николай Петров быһаарарынан, дьаһал кэҥэтиллэн, дойду таһымнанан, РФ 80-тан тахса субъегыттан АПК салайааччылара кэлэллэрин биллэрбиттэр. Онон өрөспүүбүлүкэ тыатын хаһаайыстыбатыгар хаһан даҕаны буолбатах тэрээһин ыытыллаары турар.
Үрдүк сололоох ыалдьыттары, сүнньүнэн, Нам улууһа көрсөр. Ол иһин, аҕыйах хонуктааҕыта Намҥа тахса сылдьан, таарыйа Аппааныга «Тыа сирин бигэтик сайыннарыы» федеральнай бырагыраама көмөтүнэн тутулла турар “Озернай” (нууччатымсыйбыттара сүрдээх, эбэтэр федеральнай үпкэ тииһинэр албастара дуу: I Хомустаах нэһилиэгэр эрдэ тутуллубут түөлбэни, онно биир да нуучча ыала суоҕун үрдүнэн, эмиэ нууччалыы “Молодежнай” диэн ааттаабыттара ээ…) түөлбэҕэ тиийэ сырыттым. Сүрүн бэдэрээтчит “СУ-77” ХЭУо саҥа түөлбэ инфраструктуратын барытын оҥорбут: уулуссалары асфаллаабыт, уот ситимин тардыбыт, сайыҥҥы уу уонна гаас ситимнэрэ эмиэ тардыллан, стояктара тулаайахсайбыттыы чороһон тураллар.
Саҥа дьиэлэр онно-манна көстөллөр. Тутулла тураллардыын холбоон-илбээн 50-ча буолара дуу, суоҕа дуу. Сорохтор эргэ дьиэлэрин көтүрэн аҕалан туруорбуттара, харааран, уопсай көстүүнү дьүдэтэллэр. Барыта 450 уһаайба быһыллыбыт үһү. Аппааныттан киирэн, саҥа түөлбэлиин силбэһэр асфалламмыт суол кытыытыгар нэһилиэк тэрилтэлэрэ субуотунньуктаан 50-нуу, 60-нуу маһы олордо сылдьаллар. Бөһүөлэк иһинээҕи уулуссалар кытыыларыгар дьиэлээхтэр бэйэлэрэ олордуохтаахтар үһү.
Василий НИКИФОРОВ, «Саха сирэ» хаһыат, edersaas.ru
Ааптар хаартыскаҕа түһэриилэрэ.