Саха сирэ бүттүүнэ көмөлөһөр

Бөлөххө киир:

Саха сирин олохтоохторо иэдээҥҥэ түбэспит биир дойдулаахтарын хаалларбаттар. Тэрилтэлэр, биирдиилээн да дьон көмөлөһөргө бэлэмнэрин биллэрэн, көмөнү хомуйар пууннар тэриллэн, үлэлии тураллар.

edersaas.ru

«Волонтеры-медики» уопсастыбаннай хамсааһын Саха сиринээҕи салаата, “Лидер” ыччат көҕүлээһинин киинэ, Уус Маайа, Амма, Таатта землячестволара, Аграрнай баартыйа, спортсменнар, «Бастакы көмө» уопсастыбаннай түмсүү, идэлээх сойуустар федерациялара, о.д.а. бастакынан көмөлөспүттэрэ.

Көмөлөһүөн баҕалаах элбэх. Ол эрээри сорохтор дьиэлэриттэн аҕалар кыахтара суох. Ол иһин социальнай автобус дьиэлэринэн сылдьан, көмөнү хомуйда. Автобуһу Олимпийскай эрэл училищетын дириэктэрэ, дьокутаат Алексей Филиппов биэрбитэ.

Доруобуйа харыстабылын үлэһиттэрин идэлээх сойуустарын рескома Амма улууһун киин балыыһатын үлэһиттэригэр 100 тыһ. солк. хомуйан ыытта. Култуура үлэһиттэрин идэлээх сойуустарын рескома Аммаҕа 20 кэлиэгэлэригэр тус көмө оҥордулар. Оттон федерация үлэһиттэрэ биир күннээх хамнастарын ыыттылар.

Короленко уулуссатын 25-гэр тэриллибит көмөнү хомуйар пууҥҥа дьон бородууктаны, таҥаһы, утуйар таҥаһы, хаһаайыстыбаннай маллары аҕала тураллар. Ону наардаан баран, куулларга, дьааһыктарга уган, туох баарын, ким аҕалбытын суруйан баран, “Ирбиһинэн” өрүһү туоратан, ыыта тураллар.

Култуура министиэристибэтин иһинэн үлэлиир Ресурснай-бырайыактыыр киин тустаах тэрилтэлэртэн көмөнү хомуйар. Көмө халаантан эмсэҕэлээбит култуура үлэһиттэригэр барар. Бу үлэни сүрүннүүр Любовь Николаева иһитиннэрбитинэн, билиҥҥитэ Национальнай архыып уонна Хомус мусуойун үлэһиттэрэ аҕалан туттарбыттар. Ону тэҥэ харчынан көмө эмиэ оҥоһуллуохтаах. Аһымал кэнсиэртэр, испэктээкиллэр буолаллар. Киирбит үп эмсэҕэлээбиттэргэ ыытыллар. Бу курдук хас биирдии тэрилтэ көмөлөһөр.

Дьоҥҥо көмөлөһөртөн биир да киһи туора турбата. Ким төһө кыахтааҕынан, харчынан, эбэтэр малынан, гуманитарнай көмөнү оҥорор. Өрөспүүбүлүкэ олохтоохторо ыксаллаах быһыыга-майгыга түмсүүлээхтэрин, аһыныгас санаалаахтарын көрдөрдүлэр.

Ангелина Васильева, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0