«Саха сирэ» бүгүҥҥү нүөмэрэ олус да интэриэһинэй!

Ааптар: 
Бөлөххө киир:

«Саха сирэ” хаһыат бүгүҥҥү нүөмэрэ киһи аахтар ааҕа олоруон курдук  олус интэриэһинэй.

Анал зондировщик-сөмөлүөттэр өҥөлөрө улахан. Халлааҥҥа хойуу былыт үөскээтэ  даҕаны, анал көтөр ааллар тиийэн, аллараа баттаан биэрэллэр уонна чопчу ханна тиийэн ардыахтааҕын курдук былыты салайан биэрэр кыахтаахтар. Онон чахчы абыраатылар диир кыахтаахпыт“.

“Саха сирин үрдүнэн ойуур баһаардара турбуттарын, турбатахтарын ыраахтан кэтээн көрөр камералары туруортаабыккыт. Ханнык улуустарга хас “харах” түүннэри-күннэри чыпчылыйбакка, кэтээн көрөн турарый?” Бу суруналыыс Александр Тарасов бүгүҥҥү күҥҥэ сытыытык турар боппуруоска кимниин кэпсэттэ уонна суруналыыс зондировщик сөмөлүөттэр тустарынан ыйыппытыгар ким маннык хоруйу биэрбитин бүгүҥҥү хаһыаттан билиэххит.

Улууспут 4 нэһилиэгэр аһыҥа сатыылаан, күчүмэҕэйдэри үөскэттэ” диэн ханнык улуус агронома кэпсээтэ? Бу улуус ханнык нэһилиэгин оттуур ходуһатын 80 бырыһыанын аһыҥа сиэтэ? Онон аһыҥкаттан эмсэҕэлээбит ходуһалаах нэһилиэктэр быйыл ханна оттуохтарай? Бу туһунан суруналыыс Женни Стрюкова өрөспүүбүлүкэҕэ оттооһун туһунан бллэмнээбит матырыйаалын аахтаххытына, оттооһун туһунан балаһыанньаны билиэххит.

Дьон-сэргэ уонунан сыллар тухары муспут баайдара-дуоллара ууга баран, оннооҕор таҥнар таҥастара-саптара, аһыыр астара суох хаалан, биирдэ ытыс сотуннулар. Уопсайа Дьааҥы улууһугар халаан бастакы долгунуттан түөрт нэһилиэнньэлээх пуун эмсэҕэлээтэ. «Улахан уу» диэн икки балаһанан бэриллибит матырыйаалга хаһыат суруналыыстара Дьааҥыга айылҕа алдьархайа туох хорумньуну аҕалбытын, эмсэҕэлээбит дьоҥҥо туох өйөбүл оҥоһулларын туһунан сиһилии бүгүҥҥү хаһыакка ааҕыҥ.

Эргиирдэри ааҕа испитим: “биэс эргиир, түөрт эргиир, үс эргиир хаалла…” Үһүс эргииргэ оруобуна тиһэх килэмиэтир саҕаланар этэ, онно хары чаһыбын баттаан хас бириэмэни тутуһан иһэрбин бэлиэтээбитим. Уонна… бүттэ. Ити кэнниттэн өйдүүрүм диэн окко сытабын, үрдүбэр дьон сүпсүлгэнэ. Ол аата, икки тиһэх эргиири өйбүн сүтэрэн баран сүүрбүт эбиппин. Бастаан мөлтөөбүппэр, сүүрэн киирбит дьон илиилэрин илгэ сатаабытыҥ диэн кэпсииллэр, ону эмиэ өйдөөбөппүн. Таайым уунан кутарын, ийэм биэтэккэ өйөөбүтүн барытын дьон кэпсээнинэн уонна кэнники видеоҕа көрөн билэбин. Окко олордохпуна уунан кута-кута “биэтэккэ тиийдиҥ, иккистээтиҥ!” диэбиттэрин “чэ сөп, оннук эрэ буоллун” диэн ылыммытым уонна хаттаан өйбүн сүтэрбитим. Сорохтор “бу киһи тыыннаах хаалыа дуо, өрүттүө дуо?” дии санаабыттар үһү. Оттон аттыбыттан кэтээн көрбүт ийэм барахсан туһунан этиэхпин да баҕарбаппын, тугу ол түгэҥҥэ санаабытын, толкуйдаабытын”.   Салгыы Артур Бурцев Уус Алдан спартакиадатыгар сүүрэн иһэн хайдах уҥмутун туһунан сиһилии суруналыыс Егор Карповка кэпсээбитин бүгүҥҥү хаһыакка булан ааҕыҥ диэн сүбэлиибин.

Үгүспүт бу тутан олорорбутун сыаналаабат, улахаҥҥа уурбат эбиппит. Амвросиевка, Волноваха, Донецкай, Кировскай куораттар уулуссаларынан хаама сылдьан олохпун киинэ лиэнтэтин курдук эргитэн көрбүтүм, биһиги бу маннык урусхалланыыны эрэ билбэтэрбит ханнык диэн уоһум иһигэр оргууй сибигинэйэн ылбытым”, — диэн этэр кэпсэтиибит кэмигэр Николай Борисов, Саха информационнай ааҕыныстыба анал суруналыыһа. Кини муус устарга уонна бэс ыйыгар ДНР куораттарыгар Саха сирин дэлэгээссийэтин кытары барсан кэлбитэ. Байыаннай дьайыы буола турар сирин бэйэтин илэ хараҕынан көрөн кэлбит суруналыыс сиһилии кэпсээнин бүгүҥҥү хаһыаты аахтаххытына билиэххит.

— Төһө элбэх тус сыаллаах миэстэ (целевой) көрүлүннэ? Барыта туһаныллыбакка хаалар дииллэр. Тоҕо? Туох төрүөтүнэн? Суруналыыс Людмила Поповаҕа үөрэх министиэристибэтин  ханнык эппиэттээх салайааччыта бу уонна да атын олус суолталаах боппуруостарга хоруйдаата? Ааҕыҥ уонна сэргээҥ.

Бүгүҥҥү хаһыакка суруналыыс Надежда Егорова арыгыттан, наркотиктан тутулуктаныы (созависимость) дьиэ кэргэҥҥэ хайдах үөскүүрүн уонна бу “ыарыыттан” хайдах босхолонуохха сөбүн туһунан наркология өрөспүүбүлүкэтээҕи диспансерын реабилитацияҕа отделениетын килиниичэскэй психолога Анна Ксенофонтованы кытта кэпсэтиитэ үгүс ааҕааччы болҕомтотун тардыаҕа.

Улуустар дьаһалталарыгар «икки саастаах киһини лааҕырга ыытыҥ» диэн суруктары ыыппыппытыгар, 17 улуус баһылыга хоруй биэрэн, Бүлүү эҥэртэн, киин уонна хоту улуустартан, Дьокуускай куораттан 100 киһи кэлбитэ. Саастаах дьон лааҕыра Нам улууһугар үлэлээбитин туһунан сиһилии бүгүҥҥү хаһыакка ааҕыҥ.

Кулан Хаан Баайаҕантай диэн араспаанньаны ылан, аатын пааспарыгар сахалыы уларыппытын, бука, үгүс киһи билбэтэ буолуо. Бары билэр Александр Артемьевпыт аатын тоҕо олох сахалыы уларытан  Баайаҕантай Кулан Хаан Сэргэй уола диэн ааттаммытын туһунан бүгүҥҥү хаһыаттан билиэххит.

Ити курдук, “Саха сирэ” хаһыат интэриэһинэй матырыйаалларыттан сороҕун холобурдаатым. Хаһыат чэппиэрдээҕи нүөмэри булан ааҕыҥ, сэргээҥ.

Елена ПОТОЦКАЯ, «Саха сирэ» хаһыат.

+1
0
+1
0
+1
0
+1
0
+1
0
+1
0
+1
0