Саха сирэ “Азия оҕолоро” норуоттар икки ардыларынааҕы VIII спортивнай оонньууларга бэлэмнэнэр
Саха сирин Ил Дархана Айсен Николаев олунньу 23 күнүгэр 2024 сылга ыытыллыахтаах “Азия оҕолоро” норуоттар икки ардыларынааҕы VIII спортивнай оонньууларга бэлэмнэнии туһунан мунньаҕы ыытта.
“Азия оҕолоро”норуоттар икки ардыларынааҕы оонньуулар бэрэсидьиэннэрэ Дмитрий Глушко Южно-Сахалинскайга ыытыллыбыт кыһыҥҥы оонньуулар кэмнэригэр Арассыыйа Бырабыыталыстыбатын бэрэссэдээтэлин солбуйааччы Ольга Голодеһы кытта оробуочай көрсүһүү ыытыллыбытын туһунан иһитиннэрдэ: “Көрсүһүүгэ Оонньуулар тэрийэр кэмитиэттэрин тэрийиигэ сүрүн докумуоннары оҥорууга Саха Өрөспүүбүлүкэтэ “Азия оҕолоро” сайыҥҥы спортивнай оонньуулары хас четнай сыл ахсын ыытар быраабын туһунан этии киллэрбиппит. Бу этиини Арассыыйа Бырабыыталыстыбатын вице-премьерэ өйөөбүтэ уонна Саха сирэ бэйэтин сиригэр-уотугар ахсыс спортивнай оонньуулары тэрийиэҕэ”.
Кини ону тэҥэ Саха Өрөспүүбүлүкэтин бу ахсыс оонньуулары ыытыыга сайаапката Арассыыйа Бырабыыталыстыбатын Биэдэмистибэлэр икки ардыларынааҕы хамыыһыйатын мунньаҕар бу сыл кулун тутарга көрүллүөҕэ диэтэ. Маннык сөбүлэҥи уонна Биэдэмистибэлэр икки ардыларынааҕы хамыыһыйа өйөбүлүн ылыы маннык норуоттар икки ардыларынааҕы статустаах спортивнай тэрээһиннэри ыытыыга булгуччуулаах процедуранан буолар.
Айсен Николаев Саха сирэ 2024 сылга “Азия оҕолро” ахсыс спортивнай оонньуулары ылыаҕа диэн эрэллээҕин биллэрдэ. “2024 сылга диэри төһө да биэс сыл баарын иһин, билиҥҥиттэн бэлэмнэнии үлэтин ыытыахтаахпыт, оонньуулары үрдүк таһымҥа ыытар курдук”, — диэн Ил Дархан бэлиэтээтэ.
Санатан эттэххэ, “Азия оҕолоро” ЮНЕСКО, Норуоттар икки ардыларынааҕы олимпийскай кэмитиэт, Азия Олимпийскай сэбиэтин, Арассыыйа Олимпийскай кэмитиэтин өйөбүллэринэн туһанар уонна ЮНИСЕФ билиниллэр.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата.