Аан дойду таһымнаах оонньуу быйыл от ыйын 27 — атырдьах ыйын 8 күннэригэр Владивосток куоракка ыытыллыаҕа.
Оонньуу уота Өлүөнэ очуостара ураты тыыннаах сиригэр-уотугар уматылынна. Тэрээһиҥҥэ СӨ Бырабыыталыстыбатын бэрэссэдээтэлин солбуйааччы Сергей Местников, Дьокуускай куорат мээрэ Евгений Григорьев уонна «Азия оҕолоро» аан дойдутааҕы кэмитиэтин бэрэсидьиэнэ Владимир Максимов кытыннылар. Уоту туттарар долгутулаах түгэн Үс Хатыҥҥа буолла, анал эстафетаҕа марафоҥҥа аан дойду биэс төгүллээх чөмпүйүөнэ Сардаана Трофимова, боксаҕа аан дойду вице-чөмпүйүөнэ Василий Егоров, Арассыыйаҕа буулдьанан ытыыга 1-кы миэстэлээх Алина Готовцева уонна Арассыыйаҕа чэпчэки атлетикаҕа призера Данил Андросов кытыннылар.
Эстафета түмүктэниитигэр факелы Владимир Максимов Приморскай кыраай физическай култуураҕа уонна успуорка миниистирэ Жан Кузнецовка туттарда.
«Биһиги Приморскай кыраай «Азия оҕолоро» күрэхтэһиини үрдүк таһымнаахтык тэрийиэ диэн эрэбит. Аан дойду уонна дойдубут араас муннуктарыттан элбэх хамаанда кыттыаҕа», — диэн Сергей Местников санаатын эттэ. Кини Ил Дархан Айсен Николаев быһаарыытынан кэлэр улахан оонньуу 2024 сылга Саха сиригэр ыытыллыаҕа диэн иһитиннэрдэ.
Хаартыска — ЯСИА