Саха сирэ Арктика сэбиэтин кэмигэр тырааныспар, уот уонна доруобуйа харыстабылын боппуруостарын туруорсуоҕа

Өрөспүүбүлүкэ бырабыыталыстыбата регион былаастарын уорганын уонна Федеральнай Мунньах бэрэстэбиитэллэрин холбоһуктаах мунньахтарын чэрчитинэн кэккэ боппуруостары бэлэмниир.

“Биһиги быһаарыахтаах кыһалҕалаах боппуруостарбытыгар болҕомтону ууруохтаахпыт. Үс хайысха баар. Бастакыта – тырааныспар. Иккис хайысха энергетикаҕа сыһыаннаах. Үһүс – доруобуйа харыстабыла”, — диэтэ өрөспүүбүлүкэ парламеныгар буолуохтаах көрсүһүүгэ тиэмэлэри чопчулаан Саха сирин Бырабыыталыстыбатын баһылыга Владимир Солодов.

Ити суудуналар сырыыларын, Жатайдааҕы суудуналар верфэлэрин, Өлүөнэни туоруур күргэни, Дьокуускайдааҕы ГРЭС-2 тутуу, национальнай куттал суох буолуутун хааччыйыы, онкологическай уонна кардиологическай диспансеры тутуу туһунан этиллэр.

Экэниэмикэ миниистирэ Майя Данилова “Саха Өрөспүүбүлүкэтин социальнай-экэнэмиичэскэй сайдыытыгар судаарыстыба өйөбүлүн туһунан” 2017 сыл ахсынньы 26 күнүнээҕи Федерация Сэбиэтин уурааҕын олоххо киллэриини иһитиннэрдэ.

Биэдэмистибэ баһылыга тэрээһиннэр былааннарыгар сокуон 11 көҕүлээһинин киллэриигэ сыһыаннаахтарын эттэ, итилэртэн биирдэстэрэ – Уһук Хоту уонна итиннэ тэҥнэниллибит сирдэргэ таһаҕаһы тиэйии быраап өттүнэн ураты режимин туһунан – киллэриллибэтэ.

“Сокуон барыла билигин Арассыыйа субъектарын барыта кыттыылаах оҥоһуллар. Алта сокуон барыла киллэриллибит, ол эрээри Сокуону таһаарааччылар сэбиэттэрин кэмитиэтинэн тохтотуллубут. Атын боппуруостар атын көрүҥүнэн, Госдуума дьокутааттарын таһымыгар чопчуланаллар”, — диэтэ Майя Данилова.

Федерация Сэбиэтин иһинэн Арктика уонна Антарктика сэбиэтин холбоһуктаах мунньаҕа Дьокуускайга муус устар 27 күнүгэр ыытыллыаҕа.

СИА.