Саха сирэ Архангельскайга ыытыллыбыт форумҥа Арктикаҕа дириҥ уулаах пуорду тэрийии бырайыагын билиһиннэрдэ
Архангельскайга “Арктика пуортара” дьыалабыай форум пленарнай сессиятыгар Саха Өрөспүүбүлүкэтин Бырабыыталыстыбатын Бэрэссэдээтэлэ Андрей Тарасенко Булуҥ оройуонун Найба сэлиэнньэтигэр дириҥ уулаах пуорду тэрийии бырайыагын билиһиннэрдэ.
“Билигин Тиксии пуордун кыраныыссатын кэҥэтии уонна Булуҥ оройуонун кииниттэн 112 км аныгы муора терминалын тутуу былааннанар. Бу сир тыалтан хаххалааҕа уонна дириҥ уулааҕа 10 миэтэрэҕэ диэри дириҥҥэ муора суудуналара кытылга тиксэллэригэр көмөлөөх”, — диэн кэпсээтэ Андрей Тарасенко.
Өрөспүүбүлүкэ премьерэ бэлиэтээбитинэн, сыллата навигация кэмигэр эрэгийиэн олоҕун-дьаһаҕын хааччыйыыга 2,7 мөл туонна таһаҕас тиэйиллэр, Хотугу муора суолун туһанан 300 тыһыынча туонна таһаҕас тиэйиллэр, ол иһигэр 100 тыһыынча туоннаттан тахса — Арктика атын пуортарыттан. Саха сиригэр пуорду тутуу таһаҕаһы тиэйии кээмэйин 2032 сылга 18-тан 23 мөлүйүөн туоннаҕа диэри улаатыннарыаҕа.
Пуорт бырайыага Саха сирин Ил Дархана Айсен Николаев бигэргэппит өрөспүүбүлүкэҕэ Арктика түөлбэтин сайыннарыы стратегиятыгар олоҕуран олоххо киирэр.
“Найбаттан биһиги Халыма, Индигир, Бүлүү, Өлөөн, Анаабыр, Өлүөхүмэ, Өлүөнэ уонна Дьааҥы өрүстэргэ уунан уонна сиринэн тахсыахпыт – пассажирдары уонна таһаҕаһы түргэнник уонна барыстаахтык тиэрдиэхпит”, — диэн Андрей Тарасенко бэлиэтээтэ.
Андрей Тарасенко дьон олоҕун тупсарыы, төрүт олохтоохторго төрүт үгэстэринэн уонна ыччакка сайдар кыаҕы биэрии тумус тутуллар сорук буоларын эттэ. Түгэнинэн туһанан Саха сиригэр кулун тутар 27 күнүгэр ыытыллар “Мuus uSTAR» ыччат бэстибээлигэр кыттарга ыҥырда.
“Арктика пуортара” дьыалабыай форум Архангельскайга кулун тутар 24-25 күнүгэр ыытылла турар. Ситэриилээх былаас федеральнай уонна эрэгийиэннээҕи уорганнара, тырааныспар-логистика хампаанньаларын бэрэстэбиитэллэрэ, наука үлэһиттэрэ кытталлар.
Арктика тырааныспарын тиһигин сайыннарыы – РФ Арктикаҕатааҕы түөлбэтин сайдыытын стратегиятын уона 2035 сылга диэри кэмҥэ национальнай куттал суох буолуутун хааччыйыы тутаах хайысхаларыттан биирдэстэрэ. Бу туһунан 2020 сыллаахха дойду Бэрэсидьиэнэ Владимир Путин ылыммыта. Докумуоҥҥа Хотугу муора суолунан суудуналар сырыыларын сайдыыта, хоту пуортары саҥардан тутуу, ледоколлары уонна суудуналары тутуу уо.д.а. киирэллэр.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Бэлэмнээтэ Женни Стрюкова
Хаартыска: Иван Малыгин хаартыскаҕа түһэриитэ, Архангельскай уобалас Губернаторын уонна Бырабыыталыстыбатын пресс-сулууспата