Саха сирэ аҕалар хамсааһыннарынан инники күөҥҥэ сылдьар

Бөлөххө киир:

Дьокуускайга муус устар 3-7 күннэригэр “Аҕа — дьиэ кэргэн бигэ тирэҕэ, дьиэ-кэргэн — дойду бигэ тирэҕэ!» диэн девиһинэн өрөспүүбүлүкэтээҕи Аҕалар иккис сийиэстэрэ ыытыллан, түмүктэнэн эрэр. Өрөспүүбүлүкэҕэ барыта 268 Аҕа сэбиэтэ үлэлиир. Онтон 550 дэлэгээт кэлэн, биэс күн устата тэтимнээхтик үлэлээтилэр.
Ангелина Васильева, “Саха сирэ” хаһыат, edersaas.ru


Бэҕэһээ үс былаһаакканан хайдыһан, эр дьону долгутар боппуруостары, баар кыһалҕалары ырытыспыттара. Манна дьиэ кэргэн, демография, уопсастыбаҕа аҕа оруолун, эппиэтинэһин үрдэтии, дьиэ кэргэн туруктаах буолуутун бөҕөргөтүү, эр киһи доруобуйата, дьарыктаах буолуута, уол оҕону иитии, аҕата суох оҕолорго көмө, о.д.а. тыын боппуруостары таарыйбыттара.
Муус устар 6 күнүгэр, сийиэс пленарнай мунньаҕын кэмигэр маастардар уус-уран оҥоһуктарын уонна предпринимателлэр саҥа технологияларын көрдөрөр быыстапкалар үлэлээтилэр. Маны сэргэ, хотугу улуустартан кэлбит дэлэгээттэр медицинэ киинигэр доруобуйаларын көрдөрүннүлэр, аҕалар бары “Сааскы кэм”, “Көмүөл” испэктээкиллэргэ сырыттылар, өссө чөл, доруобай олоҕу тарҕатыһан ГТО нуорматын туттардылар.
Сийиэс пленарнай мунньаҕар бырабыыталыстыба бэрэссэдээтэлин солбуйааччы Михаил Гуляев, СӨ судаарыстыбаннай сүбэһитэ Михаил Николаев, дьиэ кэргэн, ыччат миниистирэ Афанасий Владимиров, Арассыыйатааҕы Аҕалар сойуустарын толорооччу дириэктэрэ Юрий Соленов, уо.д.а. кыттыыны ыллылар.
Афанасий Владимиров бэйэтин дакылаатыгар өрөспүүбүлүкэҕэ кыргыттардааҕар элбэх уол төрүүр эрээри, эр киһи өлүүтэ 8%-нан элбэх диэн бэлиэтээтэ.
Юрий Соленов:Саха сирэ аҕалар хамсааһыннарын үлэтинэн Арассыыйаҕа инники күөҥҥэ сылдьар. Биһиги эһигиттэн элбэххэ үөрэнэбит. Бастакынан Аҕа күнүн, Уол оҕо күнүн, Булчут күнүн олохтообуккут, 124 нэһилиэк арыгы атыытыттан аккаастаммыта – бу барыта холобур эрэ буолуох тустаах. Бу сийиэстэн күүс ылан, бары нэһилиэктэргэ Аҕа сэбиэттэрэ тэриллэн, күүстээх хамсааһын тахсыаҕа диэн эрэнэбин. Сийиэс түмүгүнэн ылыллыбыт резолюцияны ГосДуумаҕа, РФ бырабыыталыстыбатыгар хайаан да тиэрдиэхпит”, — диэн эттэ.
Дэлэгээттэргэ Арассыыйатааҕы Аҕалар сойуустарын бэрэссэдээтэлэ, ГосДуума дьокутаата Александр Сидякин видео нөҥүө ыыппыт эҕэрдэтин иһитиннэрдилэр. Оттон Юрий Соленов СӨ “Аҕалар лигаларын” бэрэссэдээтэлэ Айхал Габышевка Махтал суругу туттарда.
Дакылааттар кэннэ дэлэгээттэр тахсан бэйэлэрин этиилэрин эттилэр.
“Арассыыйа ийэлэрэ” хамсааһын Саха сиринээҕи салаатын салайааччы Прасковья Борисова кэккэ кыһалҕаларга болҕомтону уурарга ыҥырда. Кини эр киһи бэйэтин доруобуйатыгар эппиэтинэһэ суох сыһыаннаһарыттан суорума суолланыыта, олохтон эрдэ барыыта тахса турар диэн эттэ. Ону тэҥэ аҥаардас төрөппүттэр оҕолоругар болҕомто уурулларыгар, дьиэ кэргэҥҥэ күүһүнэн өттөйүү суох буоларыгар баҕа санаатын тиэртэ.
Түмүккэ Михаил Гуляев «Ытык Аҕа» бэлиэни Егор Архиповка, Иван Винокуровка, Николай Захаровка, Иван Корякиҥҥа, Андрей Прудецкайга туттартаата.
Мунньах эр дьон оһуохайынан түмүктэннэ. Оһуохай тылын “Оһуохай” уопсастыба бэрэссэдээтэлин солбуйааччы, Аан Дархан этээччи Семен Черноградскай таһаарда.
Ангелина Васильева, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0