Саха сирэ 5 бастыҥ иһигэр киирдэ

Бөлөххө киир:

“Сыл бастыҥ ыала” диэн Бүтүн Арассыыйатааҕы куонкурус былырыыҥҥы кыттааччыларын истэригэр Саха сирэ  5 бастыҥ иһигэр киирдэ. Ол туһунан РФ үлэҕэ, социальнай сайдыыга министиэристибэтэ таһаарар сурунаалыгар суруйдулар.

Төһө да пандемия буоллар, былырыын куонкуруска эрэгийиэннэртэн хаһааҥҥытааҕар да элбэх сайаапка киирбит. 5 бастыҥ иһигэр Омскай, Новосибирскай, Мурманскай, Липецкэй уобаластар уонна Саха сирэ киирбиттэр. Бу уобаластарга эрэгийиэннээҕи түһүмэххэ 100-тэн тахсалыы дьиэ кэргэн кыттыбыт.

“Сыл бастыҥ дьиэ кэргэнэ” Бүтүн Арассыыйатааҕы куонкурус быйыл сэттис төгүлүн ыытыллар. Сыл аайы 3 тыһыынча кэриҥэ дьиэ кэргэн кыттар. Барыта 5 номинациялаах: “Элбэх оҕолоох дьиэ кэргэн”, “Эдэр дьиэ кэргэн”, Тыа сирин ыала”, “Кыһыл көмүс дьиэ кэргэн”, “Үгэстэри утумнуур дьиэ кэргэн”. Куонкурус дьиэ кэргэн, эппиэтинэстээх төрөппүт буолуу сыаннастарын уопсастыбаҕа үрдэтэр сыаллаах-соруктаах.

Быйыл өрөспүүбүлүкэтээҕи түһүмэх Саха АССР 100 сылыгар ананар, “Мин дьиэ кэргэним – мин Өрөспүүбүлүкэм” диэн девиһинэн ыытыллар. Ил Дархан ыйааҕынан, эбии икки номинация эбиллэр: “Кыһыл көмүс дьиэ кэргэн” уонна “Оҕону иитэ ылар дьиэ кэргэн”.

Сайаапкалары тутуу саҕаланна. Куонкурус балаһыанньатын сиһилии СӨ үлэҕэ, социальнай сайдыыга министиэристибэтин саайтыгар киирэн көрүөххэ сөп.

Ангелина Васильева, “Саха сирэ” хаһыат, edersaas.ru

Хаартыска: sakhagov.ru

+1
0
+1
0
+1
0
+1
0
+1
0
+1
0
+1
0