Саха сирэ 4G түргэннээхтик: Дьабарыкы Хайаҕа уонна Эльдикээҥҥэ мобильнай интэриниэт аан бастаан тиийдэ

Ааптар: 
Бөлөххө киир:

Уус Маайа улууһун Эльдикээн уонна Томпо Дьабарыкы Хайа бөһүөлэктэрин икки тыһыынчаттан тахса олохтоохторо түргэн мобильнай интэриниэккэ аан бастаан холбоннулар.

Билигин кинилэр гаджеттарын цифровой кыаҕын толору туһаныахтара, тоҕо диэтэххэ, чахчылары-иһитиннэриини тиэрдии тэтимэ биэстэн ордук төгүл үрдээтэ.

Бу икки бөһүөлэк Алдан эбэ кытылыгар эрэгийиэн кииниттэн 400 км тэйиччи сыталлар. Ыраах сытар уонна сибээс сиринэн ханаала тирэх ыстаансыйаларга диэри суох буолан, мобильнай ситим нэһилиэнньэлээх пууннары кэпсэтэр сервиһинэн (голосовой сервиһинэн) хааччыйбыта эрээри, бытаан этэ.

МегаФон – бу тэйиччи нэһилиэктэргэ LTE ситимин киллэрбит бастакы эпэрээтэр.

Эльдикээн 1941 сыллаахха суудуналар биэрэккэ тиксэллэригэр табыгастаах буолан, бириистэн курдук тэриллибитэ. Билигин бөһүөлэк – оройуон кыһыл көмүһү хостуур бырамыысыланнаһыгар сүрүн тарҕатар бааза, тоҕо диэтэххэ, сылы эргиччи кыһыл көмүһү хостуур бириискэлэри кытта ситимнээх. Маны сэргэ таһаҕас манна кыһыҥҥы суолунан өрөспүүбүлүкэ киин куоратыттан уонна Нерюнгри куоратыттан тиэрдиллэр, оттон сайын – уу суолунан Уус Маайаттан, Дьокуускайтан, Томмоттон.

Шахтердар олорор Дьабарыкы Хайа Эльдикээнтэн хотугулуу 164 км сытар. Манна Алдан өрүс арҕаа кытылыгар 1941 сылтан горняктар таас чоҕу хостууллар, Саха сирин оттугунан хааччыйаллар.

Дьабарыкы Хайаны уонна Эльдикээни 4G түргэн тэтимнээх интэриниэтинэн хааччыйыыга эпэрээтэргэ 10 төгүл улахан кыахтаах сиринэн канааллар бааллара, ону тэҥэ тирэх ыстаансыйаларга эбии тэрили туруоруу көмөлөспүтэ.

“Тэйиччи сытар нэһилиэнньэлээх пууннарга түргэн мобильнай интэриниэт “цифровой тэҥэ суох буолууну” туоратыыга ураты социальнай суоталаах”, — диэн МегаФон Саха сиринээҕи салаатын дириэктэрэ Мария Мамедова бэлиэтиир. – Бүгүн МегаФон 4G Саха сирин нэһилиэнньэтин 76 % хааччыйар уонна биһиги бэйэбит ситиммитин эрэгийиэҥҥэ салгыы сайыннарабыт. Бу кэмҥэ диэри Дьабарыкы Хайа уонна Эльдикээн өрөспүүбүлүкэни түргэн интэриниэтинэн хааччыйыы каартатыгар суох этилэр. Түргэн тэтимнээх канал көмөтүнэн бу боппуруоһу быһаардыбыт, онон аныгы цировой кыахтары олохтоохтор туһанар кыахтаннылар”.

Билигин бөһүөлэктэр олохтоохторо смартфоннарынан тэйиччиттэн үөрэниэхтэрин, үлэҕэ туһаныахтарын сөп, араас өҥөлөрү онлайн ылыахтара уонна сынньалаҥнарыгар туһаныахтара: киинэ көрүүттэн саҕалаан аан дойду мусуойдарыгар виртуальнай көрүҥүнэн киириэхтэрэ.

Сахаговтан

Бэлэмнээтэ Женни Стрюкова

Хаартыска: тустаах саайтан

+1
0
+1
0
+1
0
+1
0
+1
0
+1
0
+1
0