Саха сирин кыһыҥҥы чөмпүйэнээтэ саҥа быраабыланан ыытыллыаҕа

Үгэс быһыытынан, саҥа сыл тустууга бастакы түһүлгэтинэн Спорт үрдүкү маастарыстыбатын оскуолатын (ШВСМ) аһаҕас чөмпүйэнээтэ буолуоҕа. Өрөспүүбүлүкэ кыһыҥҥы чөмпүйэнээтинэн ааттанар күрэхтэһии 2018 сыл тохсунньу 3 — 4 күннэригэр “Триумф” Спорт киинигэр ыытыллара былааннанар. edersaas.ru

ШВСМ тохсунньутааҕы чөмпүйэнээтэ саҥа быраабылынан ыытыллыаҕа, ол эбэтэр бары ыйааһыннарга хапсыһыылар икки күн устата барыахтара, күрэхтэһии кыттыылаахтара күннэтэ ыйааһыннаныыны ааһыахтара. Бөҕөстөр 57, 61, 65, 70, 74, 86, 97, 125 кг ыйааһыннары сэргэ 79 кг уонна 92 кг диэри саҥа ыйааһыннарга күүстэрин холоһуохтара. Кыайыылааҕы быһаарар түмүк хапсыһыылар тохсунньу 4 күнүгэр буолуохтара. .

ШВСМ дириэктэрин солбуйааччы Леонид Спиридонов суруналыыстарга иһитиннэрбитинэн, чөмпүйэнээккэ Саха сирин бастыҥ бөҕөстөрө бары кыттыахтара. Күрэхтэһии түмүгүнэн тохсунньу эргэтигэр буолар Дмитрий Миндиашвили аатынан Тустуу академиятын уонна “Иван Ярыгин” Гран-при турнирдарыгар итиэннэ олунньуга ыытыллар Уһук Илиҥҥи уокурук чөмпүйэнээтигэр кыттар өрөспүүбүлүкэ хамаандата сүүмэрдэниэҕэ. Олорго бөҕөстөрбүт сүрүн соруктарынан дойду чөмпүйэнээтигэр төһө кыалларынан элбэх путевканы ылыы буолуоҕа.

Роман Попов, “Саха сирэ” хаһыат, edersaas.ru