Саха сиригэр IT-эйгэтин үлэһиттэрин ахсаанын 10 тыһыынчаҕа диэри элбэтиэхтэрэ
2024 сылга Саха сиригэр IT-эйгэтин үлэһиттэрин ахсаанын 10 тыһыынчаҕа диэри элбэтээри гыналлар. Бу туһунан Ил Дархан Айсен Николаев Москваҕа буолан ааспыт “Гайдардааҕы форумҥа ”Судаарыстыба уонна биисинэс сыыппараны эккирэтиигэ кэпэрээссийэлэһиилэрэ” дьүүллэһиитигэр эттэ.
“Бүгүн бу салааҕа хайы-үйэ 1,5 тыһыынча киһи үлэлиир. Биһиги 2024 сылга 10 тыһыынча киһи үлэлиэхтээх диэн соругу туруорабыт”, — диэн бэлиэтээтэ Айсен Николаев. Кини билигин Дьокуускай “Оскуола 21” IT-исписэлиистэри бэлэмнээһин эйгэтигэр Сбербаан бырайыагар киириитин туһунан кэпсэтиилэр ыытыллалларын иһитиннэрдэ.
“Биһиги бэйэбит федеральнай университеппытыгар математикаҕа дьоһун оскуолалаахпыт. Бу көмөтүнэн бу салааҕа анаан 200 кэриҥэ киһини бэлэмниибит, ол эрээри тыһыынчанан киһини бэлэмниэхтээхпит. Билигин Сбербааны кытта “Оскуола 21” мөлүйүөннээх куораттарга эрэ баар буолуо суохтаах диэн кэпсэтиини ыытабыт”, — диэтэ эрэгийиэн баһылыга.
“Оскуола 21” – Ecole 42 бырагырааммалааһыҥҥа Франция инновационнай оскуолатын аныгы ньыматынан тэриллибит Сбербаан үөрэтэр бырагыраамата. Бу оскуола 2018 сыл сэтинньититтэн үлэлиир. Оскуола расписаниета уонна учууталлара суох ураты ньыманан иһитиннэрэр технологиялар эйгэлэригэр аан дойду таһымнаах исписэлиистэри бэлэмниир.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата,
Женни Стрюкова бэлэмнээтэ.