«Саха» национальнай көрдөрөр-иһитиннэрэр хампаанньа кэрэни айа, сырдыгы саҕа, үтүөнү үллэстэ сылдьар ыытааччылара Софья Наумова уонна Айталина Константинова «Саха сатаабата суох» биэриилэрин саха көрөөччүтэ батыһа сылдьан көрөр.
Онтон бу биэриилэргэ тахсыбыт үгүс талааннаах дьонтон 19 маастар үлэтин хос көрүөххүн, үтүктүөххүн, дьоҕургун сайыннарыаххын баҕарар буоллаххына, аны ыытааччылар Софья Наумова уонна Айталина Константинова хомуйан таһаарбыт «Саха сатаабата суох» кинигэлэрин атыыластаххына, чахчы табыллаҕын.
Кинигэ ааптардара: «Баҕар, бу кинигэттэн кыым саҕыллан, ким эмэ кистэнэ сылдьар талаанын арыйыа, айар үлэ абылаҥар ылларыа, саҥа хайысханы баһылыа. Кэрэни айартан, сырдыгы саҥартан, үтүөнү үллэстэртэн ордук туох кэлиэй. Саха сатаабата суох», – диэн этэллэр.
Сонун кинигэ хас биирдии саха ыалын дьиэтигэр остуол кинигэтэ буоларыгар саарбахтаабаккын.
Альбом-кинигэҕэ киирбит хас биирдии маастар-кылааска маастар хаартыскатын, кини оҥоһугун хас хардыытын хаартысканан көрдөрөн киллэрбиттэрэ кэрэхсэбиллээх уонна туһалаах. Ол курдук, кинигэттэн туой оҥоһуктар, иистэнии, маска ойууну түһэрии, фанеранан оҥоруу, үүнээйини олордуу, тирииттэн оҥоруу уо.д.а. дьоҕур кистэлэҥнэрин билсиэххэ уонна үөрэниэххэ сөп. «Саха сатаабата суох» дииллэриниин, эн эмиэ сатыаҥ, тускар туһаныаҥ.
Атыылаһыан баҕалаахтар 89142705373 төлөпүөнүнэн билсиэххитин сөп.
Надежда ЕГОРОВА , «Саха сирэ», edersaas.ru