Эдэр көлүөнэ саахыматчыттар үрдүк таһымҥа, кыралаан да буоллар, ситиһиилэнэн эрэллэрэ киһини үөрдэр. Ааспыт ыйга Италия Сполето куоратыгар любителлэр ортолоругар ыытыллыбыт аан дойду чөмпүйэнээтигэр ХИФУ устудьуоннара, маастарга хандьыдааттар Руслан Пахомов “блицкэ” 1-кы миэстэни, “классикаҕа” 3-с миэстэни ылары ситистэ. Оттон Вилена Попова дьахталлар ортолоругар кыайыылааҕынан ааттанна.
Бу аҕыйах хонуктааҕыта Сочи куоракка буолбут оҕолорго Арассыыйа чөмпүйэнээтигэр Тааттаттан, Уус Алдантан, киин куораттан уонтан тахса үөрэнээччи сүүмэрдэнэн кытынна. Оҕолору спорт маастардара, Саха сирин хамаандатын сүрүн тренерэ Роман Ганжуров, өрөспүүбүлүкэ саахымакка федерациятын толорооччу дириэктэрэ Владимир Таппыров салайан илдьэ сырыттылар.
Быйыл кыһын өрөспүүбүлүкэ чөмпүйэнээтигэр дьахталлар ортолоругар холкутук бастаан үгүстэри соһуппут Олеся Моисееваҕа, биллэн турар, испитигэр эрэнэ санаабыппыт. Туох эмэ “тыаһы таһаарыан” сөп диэн. Кыысчаан олус дьоҕурдаах, ону баччааҥҥа диэри, үпкэ кыһарыйтаран, сөптөөх дьарыгы, бэлэмнэниини барбакка сылдьара хомолтолоох. Ол да буоллар, Олеся эрэлбитин түһэн биэрбэтэ. Чөмпүйэнээт 1-кы лигатыгар 9 тур оонньоон 8 очукуону ылла уонна муҥутуур кыайыылааҕынан таҕыста. Киһи сөҕөрө баар, кыыс өссө тиһэх тур иннинэ 7,5 очукуолана охсон, эрдэттэн кыайыыны ситистэ! Кинини аны ким да сиппэт буолан. Итинэн киин куорат 1 нүөмэрдээх орто оскуолатын 6-с кылааһын үөрэнээччитэ оҕолорго дойду чөмпүйэнээтин үрдүкү лигатыгар оонньуур быраабы ылла. Бу урукку өттүгэр 12 саастаах кыргыттарга хаһан да ситиһиллибэтэх кирбиинэн буолар. Арай 2013 сыллаахха 15 саастаах Айыына Егорова Арассыыйа үрдүкү лигатыгар кыттан, үһүс бириистээх миэстэлэммитэ. Онон чыпчаалы дабайыы салҕанар.
Афанасий Павлов, өрөспүүбүлүкэтээҕи саахымат киинин инструктора, спорт бэтэрээнэ.
Хаартыскаҕа: Италия Сполето куоратыгар ыытыллыбыт любителлэр ортолоругар аан дойду чөмпүйүөнэ Вилена Попова (бастакы эрээккэ хаҥастан бастакы) уонна чөмпүйэнээт боруонса призера Руслан Пахомов (бастакы эрээккэ хаҥастан төрдүс) Ил Түмэҥҥэ буолбут пресс-кэмпириэнсийэ кэмигэр. 2017 сыл муус устар 28 күнэ.
Роман Попов хаартыскаҕа түһэриитэ.