«Саха сүөһүтэ» СХТ племенной сибидиэтэлистибэтин болдьоҕун уһаттарда уонна бородууксуйаны оҥорууга сэртипикээт ылла
Өрөспүүбүлүкэ уон хаһаайыстыбата федеральнай племенной сибидиэтэлистибэни туппутун туһунан биһиги аҕыйах хонуктааҕыта суруйан турабыт.
Кытаанах хонтуруол бары ирдэбиллэрин толороннор, федерация таһымынан судаарыстыбаннай племенной үлэҕэ идэтийэр болдьохторун өссө биэс сылга уһатары ситиспит уон хаһаайыстыба кэккэтигэр «Саха сүөһүтэ» судаарыстыба хааһынатын тэрилтэтэ баар.
– Саха сүөһүтэ сүтэн эрэр боруода сүөһү ахсааныгар киирэр, – диир тэрилтэ сүрүн селекционер-зоотехнига Степан Заровняев. – Биһиги 2004-2017 сc. «Тускул» ГБУ быһыытынан, онтон икки сыл «Сахаагроплем» иһинэн үлэлээбиппит. Быйылгыттан «Саха сүөһүтэ» судаарыстыба хааһынатын тэрилтэтэ буоллубут. Үлэбитигэр тирэх буолар сүрүн докумуону, биэс сылга үлэлиир лиссиэнсийэни, Арассыыйа Тыатын хаһаайыстыбатын министиэристибэтиттэн ыллыбыт. Бу улахан суолталаах сибидиэтэлистибэ, маны мээнэ биэрбэттэр. Федеральнай таһымынан ирдэнэр буолан, судаарыстыба племрегистрин толорор судургута суох, ону көрдөрүүнү намтаппаккабыт, биэс сыллаах үлэбитин анаалыстаан, сылларынан, бары салааларынан ыыппыт племенной-силиэксийэлиир үлэбит отчуотун уонна кэлэр биэс сыллаах былааммытын оҥорон, дакаастаан, уһуннук үлэлэһэн, көлөһүммүтүн тоҕон, ыллыбыт. Аҥардас бэйэбит министиэристибэбит Экспертнэй сэбиэтин ааһар эмиэ судургута суох дьыала, кинилэр сүбэлэрэ-амалара эмиэ төһүү буолла. Ааспыты сырдата түһэн ыллахха, генопуонда хаһаайыстыбатын үлэлиир көҥүлүн аан бастаан 2004 с., «Тускул» тэриллэригэр, ылбыппыт. Онтон ыла, биэстии сыл буола-буола, Экспертнэй сэбиэт нөҥүө үлэбитин көмүскээн, болдьоҕун уһаттаран, кэнникитин 2017 с. ылбыппыт. Бу сыллар усталарыгар саха сүөһүтүн киин улуустарга тарҕатан, зоотехническэй-племенной үлэ тиһигин тэрийэн кэллибит. Инники өттүгэр былаан өссө үгүс, Арассыыйа Тыатын хаһаайыстыбатын министиэристибэтэ зоотехническэй-племенной үлэҕэ ирдэбилэ сылтан сыл үдээн иһэр.
Төрүт сүөһүнү иитиигэ идэтийэр генопуонда тэрилтэтин ситиһиитэ манан эрэ муҥардаммат: бородууксуйаны оҥорууга киирэннэр, саха ынаҕын арыытын оҥорорго сертификат ылбыттар итиэннэ тэхиньиичэскэй усулуобуйа оҥорторбуттар!
Ол туһунан тэрилтэ технолога Александра Жиркова маннык кэпсиир:
– Саха Өрөспүүбүлүкэтин салалтатын, чуолаан Ил Дархан Айсен Николаев өйөбүлүнэн, 232 №-дээх ыйаахха олоҕуран, «Саха сүөһүтэ» СХТ тэриллэн, саха сүөһүтүн иитии иккис тыынын ылла. Алта салааттан үһүгэр (Нам улууһун Таастааҕар, Амма улууһун Бологуругар /«Күллэги»/ уонна Горнай улууһун Маҥыраһыгар /«Кылыс»/) быйыл аан-бастаан үүт туттараммыт, былааммытын 95 % толордубут. Тэрилтэбит салайааччыта Александр Артемьев сыал-сорук туруоран, саха ынаҕыттан ылыллыбыт төрүт аспытын сөргүтээри, тэхэньиичэскэй усулуобуйа оҥордубут.
Ол техусулуобуйабыт аата: «Якутский национальный продукт «Арыы» диэн. Биллэрин курдук, саха сүөһүтүн аһа-үөлэ иҥэмтиэлээх эттиктэринэн баай, экологическай өттүнэн ыраас, киһи иммунитеты бөҕөргөтөр, араас ыарыыларга утарсар кыаҕы күүһүрдэр. Быйыл бастакы холонуу быһыытынан, 350 киилэ арыыны оҥордубут. Итиэннэ ирдэниллэр бэрэбиэркэни ааһаммыт, Декларация ыллыбыт. Инникитин бородууксуйаны элбэтиигэ үлэлэһиэхпит.