Алтынньы 22-28 күннэригэр Венгрия киин куоратыгар тустуу үс көрүҥэр – классическай, көҥүл уонна дьахтар тустуутугар – аан дойду чөмпүйэнээтэ буолар. Бу улахан түһүлгэҕэ саха тустууга оскуолатын үс иитиллээччитэ кыттар.
Бэлиэтээн эттэххэ, 1994 сылтан саҕалаан саха бөҕөстөрө аан дойду чөмпүйэнээтин көтүтэ иликтэр. Сахалартан саамай элбэхтэ аан дойду түһүлгэтигэр спорт үтүөлээх маастара Герман Контоев күрэстэспитэ – алта төгүл. Спорт үтүөлээх маастара Виктор Лебедев уонна норуоттар икки ардыларынааҕы кылаастаах спорт маастара Айаал Лазарев биэстиитэ тустан тураллар.
Быйыл Будапешка ыытыллар аан дойду түһүлгэтигэр көҥүл тустууга Белоруссия сүүмэрдэммит хамаандатыттан Владислав Андреев (57 кг) уонна Ньургун Скрябин (65 кг), Македония былааҕынан Владимир Егоров (57 кг) күрэстэһиэхтэрэ.
Ньурбаттан төрүттээх норуоттар икки ардыларынааҕы кылаастаах спорт маастара Владислав Андреев Белоруссия сэттэ төгүллээх чөмпүйүөнүнэн, Европа түөрт төгүллээх призерунан, аан дойду 2014 сыллааҕы боруонса призерунан буолар. Тириэньэрэ — Будимир Яковлев.
Тириэньэрдэр Гаврил Игнатьев, Жуматай Шубаев иитиллээччилэрэ, норуоттар икки ардыларынаҕы кылаастаах спорт маастара Ньургун Скрябин Белоруссия чөмпүйүөнүнэн, дойду Кубогын хаһаайынынан буолар. Мэҥэ Хаҥаластан төрүттээх тустуук устудьуоннар ортолоругар аан дойду чөмпүйэнээтигэр пьедестал үһүс үктэлин дабайбыта, Европа быйылгы чөмпүйэнээтигэр 65 киилэҕэ бэһис миэстэлэммитэ.
Амматтан төрүттээх спорт маастара Владимир Егоров Македония үс төгүллээх, кулууптар күрэстэригэр Германия икки төгүллээх чөмпүйүөннэринэн буолар. Былырыын 23-гэр саастаах спортсменнар ортолоругар аан дойду чөмпүйэнээтигэр ахсыс миэстэлэммитэ. Тириэньэрэ – Николай Рожин.
Быйыл Будапешт көбүөрүгэр Арассыыйа чиэһин көҥүл тустууга Заур Угуев (57 кг, Дагестан), Гаджимурад Рашидов (61 кг, Дагестан), Ахмед Чакаев (65 кг, Дагестан/Чечня), Магомедрасул Газимагомедов (70 кг, Дагестан) Заурбек Сидаков (74 кг, РСО-Алания), Ахмед Гаджимагомедов (79 кг, Дагестан), Даурен Куруглиев (86 кг, Дагестан), Батырбек Цакулов (92 кг, РСО-Алания), Абдулрашид Садулаев (97 кг, Дагестан), Анзор Хизриев (125 кг, Чечня) көмүскүөхтэрэ. Санатан эттэххэ, былырыын Францияҕа ыытыллыбыт чөмпүйэнээккэ Арассыыйа тустууктара быстар мөлтөх көрдөрүүлэммиттэрэ — биир да кыһыл көмүс мэтээли кыайан ылбатахтара. Гаджимурад Рашидов, Хетаг Цаболов, Абдулрашид Садулаев – иккис, Алан Гогаев, Владислав Валиев үһүс миэстэлэринэн дуоһуйарга күһэллибиттэрэ.
Роман Попов, edersaas.ru
Хаартыска Интэриниэттэн ылылынна